Salm 86 - An Bíobla Naofa 1981

Urnaí in Am na Trioblóide

1 Achainí Dháiví.

¹ Achainí Dháiví. 1 Claon do chluas, a Thiarna, agus éist liom, óir tá mé go dearóil dealbh.

² Déan m'anam a chosaint óir is dílis mé; fóir ar do ghiolla a bhfuil a dhóchas ionat.

³ Is tú mo Dhia; bíodh trua agat dom, a Thiarna, óir bím ag éamh ort gan stad ar feadh an lae.

⁴ Cuir áthas ar anam do sheirbhísigh, óir is chugat a thógaim m'anam, a Thiarna.

⁵ Óir is maith agus is ceansa thú, a Thiarna, lán de bhuanghrá dá mbíonn ag éamh ort.

⁶ Éist le m'urnaí, a Thiarna; tabhair aire do ghlór mo ghuí.

⁷ Is ortsa a ghlaoim lá mo bhuartha; de bhrí go n‑éisteann tú liom.

⁸ Níl do shamhail i measc na ndéithe, a Thiarna; ná níl neach ann a dhéanfadh do ghníomhartha.

⁹ Na ciníocha go léir a rinne tú, tiocfaidh siad do d'adhradh, a Thiarna; agus déanfaidh siad d'ainm a fhógairt.

¹⁰ Óir is éachtach tú agus is iontach iad do ghníomhartha; is tú amháin is Dia ann.

¹¹ Múin do shlí dom, a Thiarna; i dtreo go siúlfainn i d'fhírinne; agus déan mo chroí a dhíriú, i dtreo gurab eagal liom d'ainm.

¹² Tabharfaidh mé buíochas duit ó chroí, a Thiarna Dia; agus molfaidh mé d'ainm go brách.

¹³ Óir ba mhór é do thrócaire go deimhin orm; sciob tú m'anam leat ó dhuibheagán ifrinn.

¹⁴ D'éirigh lucht díomais i m'éadan, a Dhia, tá drong gan trua ar thoir m'anama, drong nach bhfuil aird acu ortsa.

¹⁵ A Thiarna Dia na trua agus na taise, ar deacair thú a spreagadh chun feirge, agus atá lán de ghrá agus d'fhírinne:

¹⁶ Féach orm agus bíodh trua agat dom. Tabhair neart do do ghiolla, a Thiarna, agus cúnamh do mhac do bhanóglaigh.

¹⁷ Tabhair dom comhartha do cheana go bhfeice mo naimhde é is go ndéantar a náiriú, toisc gur bhronn tú orm cabhair agus sólás, a Thiarna.