Salm 76 - An Bíobla Naofa 1981

Altú Buíochais as ucht Bua a Bhreith

¹ Do stiúrthóir an chóir. Ar théada cheoil. Salm Ásáf. Amhrán.

² Tá aithne ar Dhia in Iúdá; tá a ainm in airde in Iosrael.

³ I Sailéim atá a bhoth agus i Síón a áras cónaithe.

⁴ Is ann a bhris sé na saigheada lonracha - an sciath is an claíomh is an trealamh troda. Selah

⁵ Is solasmhar maorga thú, a Thiarna; is cumhachtaí tú ná [na sléibhte síoraí].

⁶ Tá lucht an chroí chalma arna gcreachadh, codlaíonn siad ina dtoirchim suain; tá lucht na lámh láidir gan taca.

⁷ A Dhia Iacóib, nuair a labhair tú go bagrach rinneadh staic de charbaid agus d'eachra.

⁸ Is uafásach tú! cé a sheasfaidh i d'éadan; nuair a bhíonn racht róbhuile ort?

⁹ Nuair a thug tú breithiúnas ó neamh ghabh critheagla an talamh agus thost sé.

¹⁰ Nuair a d'éirigh Dia a thabhairt breithiúnais, a tharrtháil daoine ísle na cruinne. Selah

¹¹ Déanfaidh fraoch an duine féin thú a mholadh; déanfaidh fuíoll a chuid feirge crios duit.

¹² Díolaigí bhur móideanna leis an Tiarna bhur nDia - 12 an té a bhaineann an t‑anam as taoisigh gur uafásach le ríthe na cruinne é.