Salm 72 - An Bíobla Naofa 1981

Ríocht an Mheisias

1 [Salm] Sholaimh.

¹ [Salm] Sholaimh. 1 Bronn do bhreithiúnas, a Dhia, ar an rí, agus d'fhíréantacht ar mhac an rí;

² chun go dtuga sé ceartbhreithiúnas ar a phobal agus cothrom do dhaoine bochta.

³ Go n‑iompraí na sléibhte síocháin don phobal agus na cnoic fíréantacht.

⁴ Go ndéana sé cosaint ar dhaoine ísle an phobail; go saora sé clann na mbocht, agus go mbrú sé lucht daorsmachta.

⁵ Go maire sé mar an ghrian agus an ghealach; ó aois go haois;

⁶ mar fhearthainn ar an bhfód féir ghlais; mar cheathanna ar an talamh.

⁷ Go mblátha síocháin agus fíréantacht lena linn nó go meathfaidh an ghealach.

⁸ Go raibh a réim ó mhuir go muir; ón Abhainn Mhór go críocha na cruinne.

⁹ Titfidh a naimhde ina láthair; lífidh siad an luaithreach.

¹⁰ Tiocfaidh ríthe Thairsís agus na nInsí, ag triall air le tabhartais. Tabharfaidh ríthe na hAráibe agus Seaba bronntanais chuige.

¹¹ Cromfaidh an uile rí go talamh ina láthair; déanfaidh gach cine fónamh dó.

¹² Óir saorfaidh sé an bocht nuair a ghlaofaidh sé air; agus an donán gan chúnamh.

¹³ Beidh trua aige don lag is don bhocht, agus sábhálfaidh an duine dealbh.

¹⁴ Saorfaidh sé a n‑anam ón bhfeall is ón bhforéigean; óir is luachmhar leis a bhfuil.

¹⁵ Go maire sé i bhfad is go mbronntar air ór na hAráibe. Beifear ag guí ar a shon i gcónaí; á bheannachadh ar feadh an lae.

¹⁶ Go raibh flúirse arbhair sa tír go mullach na sléibhte. Go raibh seordán a thoradh amhail an Liobáin agus lucht na gcathracha faoi bhláth mar fhéar ar an talamh.

¹⁷ Go moltar a ainm go brách, fad a bheidh an ghrian ann. Is tríd a bheannófar gach treibh; beidh gach cine á mholadh.

¹⁸ Moladh leis an Tiarna, Dia Iosrael, an tAon amháin a dhéanann éachtaí.

¹⁹ Go moltar a ainm glórmhar go brách; go líona a ghlóir an talamh. Amen! Amen!

²⁰ Críochnaítear leis seo moltaí Dháiví.