Salm 65 - An Bíobla Naofa 1981

Altú Buíochais do Dhia

¹ Do stiúrthóir an chóir. Salm Dháiví. Amhrán.

² Is duit is dleacht ár moladh i Síón, a Dhia. Is duit a chomhlíonfar ár móid,

³ ós tú a éisteann lenár nguí. Ortsa atá triall gach aon neach

⁴ lena eire urchóide. Luíonn ár lochtanna go trom orainn ach tugann tusa maithiúnas dúinn.

⁵ Is méanar don té a roghnaíonn tú, á ghlaoch chun do chúirteanna. Sásófar le flúirse do thí sinn, le hionad naofa do theampaill.

⁶ Déanann tú éachtaí i d'fhíréantacht dúinn, a Dhia ár slánaithe. Dóchas críocha uile na cruinne thú agus na bhfarraigí imigéiniúla.

⁷ Daingníonn tú na sléibhte le do neart ar do chrioslú le cumhacht.

⁸ Maolaíonn tú fothram na farraige agus torann na dtonnta agus gleo na gciníocha.

⁹ Lucht cónaithe chríocha na cruinne, is eagal leo d'éachtaí. Cuireann tú áthas ar imill imchiana an Oirthir is an Iarthair.

¹⁰ Thug tú cuairt ar an talamh, á huisciú, gur mhéadaigh tú a maoin. Sceitheann abhainn Dé thar bruacha d'fhonn arbhar a sholáthar di.

¹¹ Is mar sin a ullmhaíonn tú an talamh, ag tabhairt uisce dá claiseanna. Déanann tú a bogadh le ceathanna; beannaíonn tú a geamhair.

¹² Chuir tú barr ar an mbliain le d'fhéile agus tá do chéimeanna ar sileadh le méathras

¹³ agus féaraigh an fhásaigh faoi bhláth. Tá na cnoic arna gcrioslú le gairdeas 13 agus na móinéir ag cur thar maoil le tréada. Tá na gleannta faoi bhrat arbhair; tógann siad gártha agus canaid le háthas.