Salm 60 - An Bíobla Naofa 1981

Urnaí tar éis an Chatha

¹ Do stiúrthóir an chóir. Leis an bhfonn “Lile an Dlí”. Mictam le Dáiví. Le foghlaim.

2 Nuair a ghabh sé amach i gcoinne Arám Naharaím agus Arám Zóbá nuair a tháinig Ióáb ar ais gur threascair sé Eadóm i nGleann an tSalainn - 12,000 (fear).

² Nuair a ghabh sé amach i gcoinne Arám Naharaím agus Arám Zóbá nuair a tháinig Ióáb ar ais gur threascair sé Eadóm i nGleann an tSalainn - 12,000 (fear).

³ Theilg tú uait sinn, a Dhia, agus threascair tú sinn; bhí tú i bhfeirg linn, fill orainn arís.

⁴ Chroith tú an talamh agus scoilt tú é. Déan a chréachtaí a leigheas óir tá sé ar crith.

⁵ Chuir tú do phobal faoi chuing an chruatain, thug tú fíon ár mearaithe le hól dúinn.

⁶ Thug tú comhartha don dream lenarb eagal tú ionas go dteithfidís as raon an bhogha, Selah

⁷ agus go ndéanfaí d'aos grá a shaoradh. Fóir orainn le do dheasláimh agus éist linn.

⁸ Labhair Dia ina shanctóir agus gheall sé: “Roinnfidh mé Seicim go ríméadach agus déanfaidh mé Gleann Sucót a thomhas.

⁹ Is liom tír Ghileád, is liom Manaise; is é Eafráim clogad mo chinn, is é Iúdá mar an gcéanna mo ríshlat;

¹⁰ is é Móáb mo bháisín níocháin. Ar Eadóm a bhuailfidh mé mo bhróg, agus béarfaidh mé bua ar Fhilistía.”

¹¹ Cé sheolfaidh isteach mé sa chathair chosanta? Cé thabharfaidh go hEadóm isteach mé?

¹² Nach tú a chuir uait sinn, a Dhia, ionas nach ngabhann tú amach lenár sluaite?

¹³ Tabhair cúnamh dúinn in éadan ar naimhde óir is díomhaoin é cúnamh ón duine.

¹⁴ Déanfaimid gaisce le cunamh ó Dhia óir is é a ghabhfaidh de chosa inár naimhde.