Salm 55 - An Bíobla Naofa 1981

Feall agus Faltanas

¹ Do siúrthóir an chóir. Ar théada ceoil. Mascil Dháiví.

² Tabhair cluas do m'urnaí, a Dhia: ná téigh i bhfolach ó m'achainí.

³ Tabhair aire dom agus éist le mo ghuí, óir tá mé cloíte ag an mbuairt.

⁴ Táim ar crith de bharr gártha an namhad agus ansmacht na n‑urchóideach; óir tarraingíonn siad an t‑olc anuas orm; bíonn siad do mo chiapadh le neart a bhfeirge.

⁵ Tá mo chroí arna chloí ionam istigh: titeann eagla an bháis orm.

⁶ Tagann sceimhle is scanradh orm anuas, tá mé i mo stalc ag an uamhan.

⁷ “Mo thrua,” a deirim, “gan sciatháin an choilm agam; d'eitleoinn liom faoi shuaimhneas.”

⁸ Is amhlaidh a rachainn in imigéin go ndéanfainn cónaí san fhásach.

⁹ Theithfinn gan mhoill ar lorg fothana ón stoirm is ón spéirling;

¹⁰ ó anfa clúmhillteach mo namhad, ó thonn tuile a dteangacha. Óir ní fheicimse aon ní sa chathair ach imreas is éigean;

¹¹ siúlann siad ballaí na cathrach de lá agus d'oíche. Is lán í d'olc agus d'urchóid;

¹² Tá an peaca ina lár. Ní scarann an foréigean ná an feall lena sráideanna choíche.

¹³ Dá mba namhaid é an té a thug aithis dom d'fhéadfainn cur suas leis. Dá mba eascara a d'éirigh i m'éadan rachainn i bhfolach uaidh.

¹⁴ Ach tusa! mo dhlúthchara féin is mo chaomhchompánach a rinne an ní seo!

¹⁵ Ba chairde cléibh sinn a shiúil in éineacht in áras Dé.

¹⁶ Go gcastar an bás go tobann orthu; go dté siad beo san uaigh síos. Óir cónaíonn an urchóid ina n‑árais agus i gceartlár a gcroí.

¹⁷ Ach glaofaidh mise ar Dhia agus saorfaidh an Tiarna mé.

¹⁸ Ar maidin, meán lae, is tráthnóna 18b beidh mé ag caí is ag caoineadh. 18c ach cluinfidh Dia mo ghlór.

¹⁹ Fuasclóidh sé m'anam go sítheach ón gcath seo a chuirim - óir is iomaí sin duine a throideann liom -

²⁰ Éistfidh sé liom agus cloífidh iad; (tá sé ann ón tsíoraíocht), óir ní théann siad i bhfeabhas ar aon chor, ná ní eagal leo Dia. Selah

²¹ Síneann gach aon neach a lámh in aghaidh a chairde; briseann sé a chonradh.

²² Is sleamhaine a bhriathra ná im, ach tá cogadh ina chroí. Is boige a bhriathra ná ola, ach is claímhte arna nochtadh iad.

²³ Caith do chúram ar an Tiarna agus déanfaidh sé taca duit; ní leomhfaidh sé go mbainfear barrthuisle as an bhfíréan go brách.

²⁴ Ach seolfaidh tusa síos iad, a Thiarna, go poll an bháis; ní bhfaighidh lucht fola agus fill ach leath a laethanta. Is ort atá mo sheasamh, a Thiarna.