Salm 52 - An Bíobla Naofa 1981

Peacaí na Teanga

¹ Do stiúrthóir an chóir. Mascil de chuid Dháiví

2 nuair a tháinig Doéig an tEadómach chuig Sól á rá leis: “Chuaigh Dáiví isteach i dteach Aichímeilic.”

² nuair a tháinig Doéig an tEadómach chuig Sól á rá leis: “Chuaigh Dáiví isteach i dteach Aichímeilic.”

³ Cad chuige duit bheith ag maíomh as do mhioscais, a ghaiscígh na hurchóide?

⁴ Déanann tú uisce faoi thalamh feadh an lae, agus faobhar ar do theanga mar rásúr géar, a chealgaire ghlic.

⁵ Is ansa leat an t‑olc ná an mhaitheas, an t‑éitheach ná an fhírinne.

⁶ Is áil leat an uile chaint dhíobhálach, a theanga na camastaíola.

⁷ Uime sin déanfaidh Dia do scriosadh agus do mhilleadh go deo. Sracfaidh sé as do bhoth amach thú agus bainfidh sé amach ó fhréamh thú as talamh na mbeo.

⁸ Feicfidh na fíréin is beidh eagla orthu; beidh siad ag gáire faoi, á rá:

⁹ “Sin é an fear nár mhian leis go mbeadh Dia ina dhaingean aige, ach a chuir a dhóchas in iomad a mhaoine agus a neart ina choirpeacht.”

¹⁰ Ach bímse mar úrchrann olóige in áras Dé; ‘s tá mo dhóchas i ndilghrá Dé go brách agus choíche.

¹¹ Tabharfaidh mé buíochas duit go deo de bharr a ndearna tú, agus fógróidh mé feabhas d'ainmse i bhfianaise na bhfíréan.