Salm 51 - An Bíobla Naofa 1981

Aithrí agus Croíbhrú an Pheacaigh

¹ Do stiúrthóir an chóir. Salm Dháiví,

2 an uair a tháinig Nátán fáidh chuige tar éis do [Dháiví] peaca a dhéanamh le Baitseaba.

² an uair a tháinig Nátán fáidh chuige tar éis do [Dháiví] peaca a dhéanamh le Baitseaba.

³ Déan trócaire orm, a Dhia, de réir do bhuanghrá: cealaigh mo choir as iomad do thrua.

⁴ Nigh go huile mé ó mo chion, agus déan mo pheaca a ghlanadh díom.

⁵ Óir aithním mo chionta go maith agus tá mo pheaca os mo chomhair i gcónaí.

⁶ Is ortsa amháin a pheacaigh mé; an ní is olc i do láthair a rinne mé. Ionas go mba léir gur ceart é do bhreith agus go dtugann tú breithiúnas gan locht.

⁷ Ach féach gur rugadh faoi chion mé agus gur gineadh i mbroinn mo mháthar faoi pheaca mé.

⁸ Féach, is geal leat an croí dílis, agus i mo lár istigh múineann tú eagna dom.

⁹ Croith orm hiosóip agus glanfar mé; nigh mé agus is gile mé ná an sneachta.

¹⁰ Lig dom an gairdeas agus an t‑áthas a chloisteáil, agus beidh lúcháir ar na cnámha a bhrúigh tú.

¹¹ Iompaigh do ghnúis ó mo pheacaí agus cealaigh mo chionta go léir.

¹² Cruthaigh ionam croí glan, a Dhia, agus cruthaigh spiorad daingean as an nua ionam.

¹³ Ná díbir amach as do radharc mé agus ná beir do naomhspiorad uaim.

¹⁴ Tabhair ar ais dom áthas do shlánaithe agus tabhair spiorad na díograise mar thaca dom.

¹⁵ Múinfidh mé do shlite do lucht na hurchóide agus fillfidh na peacaigh ar ais chugat.

¹⁶ Saor mé ó choir na fola, a Dhia, a Dhia mo shlánaitheoir, agus mórfaidh mé le mo theanga do cheartas.

¹⁷ A Thiarna, oscail mo bheola, agus fógróidh mo bhéal do mholadh.

¹⁸ Óir ní bhfaigheann tú taitneamh in íobairt agus an loiscíobairt a dhéanfainn ní ghlacfá.

¹⁹ M'íobairtse, a Dhia, an croí aithríoch; ní eiteoidh tú, a Dhia, croí brúite uiríseal.

²⁰ Bí fial le Síón, as ucht do mhaitheasa, a Thiarna, ionas go dtógfaí ballaí Iarúsailéim as an nua.

²¹ Glacfaidh tú ansin le híobairtí na fíréantachta, le hofrálacha agus le híobairtí uileloiscthe: ansin ofrálfar mairt chugat ar d'altóir.