Salm 49 - An Bíobla Naofa 1981

Baois agus Beagthairbhe Shaibhreas an tSaoil Seo

¹ Do stiúrthóir an chóir. Salm chlann Chorach.

² Éistigí, a chiníocha go léir, tugaigí cluas, a áitritheoirí na cruinne,

³ íseal agus uasal in éineacht, saibhir agus daibhir le chéile.

⁴ Labhróidh mo bhéal briathra ciallmhara; is lán mo chroí de thuiscint.

⁵ Claonfaidh mé mo chluas le fáthscéal, sceithfidh mé mo rún leis an gcláirseach.

⁶ Cén fáth a mbeadh eagla orm lá an oilc agus mioscais lucht ceilge i mo thimpeall -

⁷ dream a mbíonn a ndóchas ina saibhreas agus a mhaíonn as méid a maoine?

⁸ Ní thig le haon duine é féin a fhuascailt ná éiric a anama a dhíol le Dia;

⁹ is ródhaor aige éiric a anama.

¹⁰ Ní thig leis síorbheatha a cheannach le súil nach bhfeice sé an uaigh.

¹¹ Feiceann sé an saoi agus an daoi ar lár agus a maoin ag daoine eile ina ndiaidh.

¹² Tuamaí is dídean dóibh go brách, a n‑árais chónaithe ó ghlúin go chéile cé go mbíodh a n‑ainm in airde sa tír.

¹³ Óir ní buan é séan an duine; is cosúil é leis na beithígh a théann ar ceal.

¹⁴ Slí na baothmhuiníne a slí siúd, críoch na droinge lenarb áil a maoin. Tiomáintear iad mar chaoirigh chun na huaighe

¹⁵ mar a ndéanfaidh an bás a n‑aoireacht agus mar a gcuirfear faoi smacht na bhfíréan iad. Imeoidh a dtaibhse ar maidin; san uaigh a bheidh a n‑áras acu feasta.

¹⁶ Ach saorfaidh Dia m'anamsa ar ifreann an uair a ghlacfaidh sé chuige féin mé.

¹⁷ Ná bíodh eagla ort má éiríonn duine saibhir; má mhéadaíonn ar mhaoin a theaghlaigh.

¹⁸ Nuair a éagfaidh sé ní bhéarfaidh sé dada leis, ná ní rachaidh a rachmas chun na huaighe leis.

¹⁹ Cé gur bhreá leis a shaol fad a mhair sé - “maífidh gach aon neach mo shéanmhaireacht” -

²⁰ rachaidh sé i bhfochair a shinsear nach bhfeicfidh an solas go brách.

²¹ Óir ní buan é séan an duine; is cosúil é leis na beithígh a théann ar ceal.