Salm 44 - An Bíobla Naofa 1981

Bua agus Briseadh Iosrael

¹ Do stiúrthóir an chóir. Mascil chlann Chorach.

² Chualamar lenár gcluasa féin é, a Dhia, agus d'inis ár n‑aithreacha féin dúinn na hoibreacha a rinne tú fadó, na héachtaí a rinne tú lena linn.

³ Mar chuir tú féin na ciníocha i mbéal a gcinn gur phlandaigh tú ár sinsir ina n‑ionad.

⁴ Óir ní lena gclaíomh féin a ghabhadar an talamh níorbh é a gcuisle féin a shaor iad ach do dheaslámh féin is do chuisle agus gile do ghnúise, mar b'iad do ghrá iad.

⁵ Is tú mo rí agus mo Dhia a thug barr agus bua do Iacób.

⁶ Is tríotsa a chloíomar ár naimhde gur ghabhamar de chosa i lucht ceannairce i d'ainm.

⁷ Óir ní i mo bhogha a chuir mé mo dhóchas, ná níorbh é mo chlaíomh a thug saor mé,

⁸ ach is tusa a shábháil ónár naimhde sinn agus a chuir náire ar an drong a thug fuath dúinn.

⁹ Bhímis ag maíomh as Dia i dtólamh agus ag tabhairt moladh do d'ainm de shíor. Selah

¹⁰ Ach anois tugann tú droim láimhe dúinn go dímheasúil agus ní ghabhann tú amach lenár sluaite.

¹¹ Tugann tú orainn cúlú roimh ár naimhde agus déanann lucht ár bhfuatha slad orainn.

¹² Thug tú suas sinn mar chaoirigh chun ár maraithe. Chuir tú scaipeadh orainn ar fud na gciníocha.

¹³ Dhíol tú do phobal in aisce, agus ní bhfuair tú dada de bharr a ndíolta.

¹⁴ Rinne tú ábhar achasáin dínn dár gcomharsana, cúis gháire dá mbíonn inár dtimpeall,

¹⁵ ceap aithise i mbéal na gciníocha agus ceap magaidh i measc na náisiún.

¹⁶ Bíonn mo tharcaisne os mo chomhair de shíor agus luisne na náire i mo leiceann

¹⁷ de bharr ghlór an scigire agus an sciolladóra de dheasca an namhad agus an díoltasaí.

¹⁸ Tháinig na nithe seo uile orainn anuas siúd is nach ndearnamar dearmad ort, is nach rabhamar mídhílis do do chonradh

¹⁹ ná ní dheachaigh ár gcroí ar gcúl, ná ní dheachaigh ár gcosa ar seachrán uait,

²⁰ bíodh gur bhrúigh tú in áit na hainnise sinn agus gur fholaigh tú le scáil an bháis sinn.

²¹ Dá ndéanaimis dearmad ar ainm ár nDé nó dá leathaimis ár lámha chun dé eile,

²² nach mbeadh a fhios sin ag Dia? Óir is eol dó rúndiamhra an chroí.

²³ Ar do shonsa tugtar ár n‑ár ar feadh an lae agus meastar sinn mar chaoirigh atá le bású.

²⁴ Múscail! Cad é an codladh sin ort, a Thiarna? Bí i do dhúiseacht! ná diúltaigh dúinn de shíor!

²⁵ Cén fáth a gceileann tú do ghnúis orainn agus nach cuimhin leat ár n‑ainnise is ár n‑ansmacht?

²⁶ Óir leagadh ar lár sinn sa luaithreach agus buaileadh ár gcorp ar an talamh.

²⁷ Éirigh i do sheasamh agus cabhraigh linn agus fuascail sinn as ucht do thrócaire.