Salm 37 - An Bíobla Naofa 1981

Séan Soghluaiste na nUrchóideach

1 [Salm le] Dáiví.

¹ [Salm le] Dáiví. 1 Ná bíodh buairt ort faoi lucht an drochiompair; ná bí in éad le lucht déanta na hurchóide;

² óir dreofaidh siad go luath ar nós an fhéir agus feofaidh siad amhail luibheanna glasa.

³ Cuir do dhóchas sa Tiarna agus déan an mhaith, agus mairfidh tú sa tír go sábháilte.

⁴ Má thugann tú taitneamh don Tiarna tabharfaidh seisean duit mian do chroí.

⁵ Taobhaigh do shlí leis an Tiarna; cuir do dhóchas ann agus déanfaidh sé beart

⁶ i dtreo go n‑éireoidh d'fhíréantacht mar sholas agus d'ionracas mar ghrian an mheán lae.

⁷ Glac suaimhneas sa Tiarna agus foighnigh leis: ná bíodh ceist ort faoin té ar a mbíonn an séan, ná faoin duine a chleachtann an choirpeacht

⁸ Cuir uait an fraoch agus an fíoch; ná bí i bhfeirg, óir ní thiocfaidh di ach dochar;

⁹ Óir dísceofar lucht déanta an oilc agus gheobhaidh lucht na foighne an talamh.

¹⁰ Ní fada go mbeidh deireadh leis an drochdhuine Féach a ionad! ní ann dó feasta.

¹¹ Ach beidh seilbh an talaimh ag na hísle beidh a n‑aoibhneas i lánmhaireacht an tsuaimhnis.

¹² Beartaíonn an t‑urchóideach in aghaidh an fhíréin: baineann díoscán as a fhiacla ina choinne.

¹³ Ach gáireann an Tiarna go fonóideach faoi, óir is eol dó go bhfuil a lá tar éis teacht.

¹⁴ Tarraingíonn na héagráifigh an claíomh; 14b teannann siad an bogha a threascairt an duine ionraic. 14c a threascairt lucht an ghátair agus na mbocht.

¹⁵ Tollfaidh a gclaíomh a gcroí féin agus brisfear a mbogha ina bhloghanna.

¹⁶ Is fearr an beagán atá ag an bhfíréan ná maoin is mórshaibhreas na n‑éagráifeach;

¹⁷ óir brisfear ar chumhacht na n‑éagráifeach agus beidh an Tiarna ina chúl taca ag an bhfíréan.

¹⁸ Ar an Tiarna atá cúram na neamhurchóideach, agus mairfidh a n‑oidhreacht go brách.

¹⁹ Ní thabharfar a náire in am na tubaiste, agus líonfar iad in am an ghorta.

²⁰ Rachaidh na héagráifigh go léir ar ceal mar aon le naimhde an Tiarna. Is cosúil iad le háilleacht neamhbhuan an mhachaire agus rachaidh siad ar ceal ar nós deataigh.

²¹ Ní aisíocann an t‑éagráifeach a iasacht, ach tugann an fíréan uaidh go flaithiúil.

²² Beidh an talamh ag lucht beannaithe an Tiarna, ach dísceofar an dream a mhallaigh sé.

²³ Stiúrann an Tiarna coiscéimeanna an duine agus déanann slí an té is geal leis sábháilte.

²⁴ Má thuislíonn sé ní leagfar ar lár é, ós é an Tiarna é féin a thaca.

²⁵ Bhí mé óg, agus anois tá mé aosta, ach ní fhaca mé riamh an fíréan á thréigean ná a shliocht ag iarraidh a gcoda.

²⁶ Bíonn sé fial i gcónaí; tugann sé iasacht uaidh, agus beannófar a shliocht dá éis.

²⁷ Seachain an t‑olc, déan an mhaith agus mairfidh tú go buan mar a bhfuil tú.

²⁸ Óir is geal leis an Tiarna an fhíréantacht agus ní thréigfidh sé a dhílseoirí go deo. Déanfar lucht na héagóra a dhíothú agus sliocht na n‑urchóideach a scriosadh.

²⁹ Tiocfaidh na fíréin in oidhreacht an talaimh agus mairfidh siad ann go brách.

³⁰ Bíonn béal an fhíréin ag labhairt eagna agus canann a theanga an ceart;

³¹ bíonn dlí a Dhé ina chroí, ní bhíonn a chosa ag imeacht uaidh.

³² Bíonn an t‑urchóideach ag faire an fhíréin agus fonn a mharaithe air.

³³ Ní fhágfaidh an Tiarna faoina smacht é, ná ní dhaorfaidh é nuair a thabharfaidh sé breith air.

³⁴ Fan leis an Tiarna; bí dílis dó agus tabharfaidh sé ardú céime duit, go mbronnfaidh ort seilbh na talún; agus feicfidh tú díothú na n‑urchóideach.

³⁵ Chonaic mé an t‑urchóideach go huaibhreach ina sheasamh amhail céadras na Liobáine.

³⁶ Ag gabháil thar bráid dom athuair bhí sé imithe; chuaigh mé á lorg ach ní raibh sé le fáil.

³⁷ Féach an fíréan, tabhair do d'aire an duine ionraic, óir beidh sliocht ag fear na síochána;

³⁸ ach dísceofar na peacaigh uile le chéile; déanfar sliocht na n‑éagráifeach a scriosadh.

³⁹ Ón Tiarna a thagann slánú na bhfíréan, is é a ndídean é in am na trioblóide.

⁴⁰ Tiocfaidh an Tiarna i gcabhair orthu lena bhfuascailt; sábhálfaidh sé iad ó na hurchóidigh de bhrí gurb ann atá a ndóchas.