Salm 36 - An Bíobla Naofa 1981

Trócaire an Tiarna

¹ Do stiúrthóir an chóir. [Salm le] Dáiví, giolla an Tiarna.

² Labhraíonn an urchóid leis an bpeacach i ndiamhair a chroí. Ní choimeádann sé eagla Dé os comhair a shúl.

³ Cuireann sé ina luí ar a aigne nach eol do dhaoine an choir atá déanta aige agus nach fuath leo í.

⁴ Tá urchóid agus cealg ina bhéal níl ciall aige don mhaith.

⁵ Meabhraíonn sé mioscais agus mallaitheacht ina luí ar a leaba dó. Gabhann sé i slí nach maith agus ní shéanann sé an t‑olc.

⁶ Sroicheann do bhuanghrá na flaithis, a Thiarna, agus do dhílse na néalta. Tá d'fhíréantacht mar shléibhte Dé:

⁷ do bhreithiúnas mar an duibheagán. Tugann tú dídean don duine is don bheithíoch.

⁸ A Thiarna, nach luachmhar é do bhuanghrá! Agus tagann an Ádhamhchlann ag triall ort go ngabhann faoi scáth do sciathán.

⁹ Líontar le méitheas do thí iad tugann tú deoch dóibh as abhainn d'aoibhneas,

¹⁰ óir is leatsa atá foinse na beatha; agus i do sholas-sa a fheicimid an solas.

¹¹ Bíodh grá agat de shíor do lucht d'adhartha, agus cothromas do lucht an chroí dhírigh.

¹² Ná gabhadh an díomasach de chosa orm: ná caitheadh lámh an drochdhuine amach mé. 12b Féach mar a leagadh lucht déanta na hurchóide; tá siad ar lár agus ní fhéadann éirí.