Salm 35 - An Bíobla Naofa 1981

Urnaí in Aghaidh an Namhad

1 [Salm le] Dáiví.

¹ [Salm le] Dáiví. 1 Tagair mo chúis, a Thiarna, in aghaidh mo naimhde: cuir cath ar a mbíonn ag troid liom.

² Gabh chugat do sciath agus do lúireach, agus éirigh do mo chúnamh.

³ Beartaigh an ga agus [an tsleá] in aghaidh lucht mo thóraíochta. Abair le m'anam, a Thiarna: “Is mise do shlánú.”

⁴ Go dtugtar náire agus tarcaisne ar an dream atá ar tí mo mharaithe. Go gcuirtear ar gcúl faoi náire lucht beartaithe oilc i m'aghaidh.

⁵ Go gcuire aingeal an Tiarna an ruaig orthu amhail cáith roimh an ngaoth;

⁶ go raibh a slí go sleamhain dúdhorcha agus aingeal Dé ar a dtí.

⁷ Leathadar a líon dom gan chúis: rinneadar uaigh dom gan ábhar.

⁸ Go dtaga orthu díothú gan choinne; go gceaptar iad féin sa líon a chuir siad i bhfolach romham. Go dtite siad sa chlais.

⁹ Déanfaidh m'anamsa lúcháir sa Tiarna: déanfaidh mé gairdeas ina shlánú.

¹⁰ Déarfaidh mé ó mo chroí go hiomlán: “Cé is cosúil leat, a Thiarna, an té a tharrthaíonn an truán ón tréanfhear, an duine dealbh ón tíoránach?”

¹¹ Éiríonn finnéithe bréige i m'éadan do mo cheistiú ach mé aineolach.

¹² Díolann siad an t‑olc in aghaidh na maithe liom: tá m'anam go brónach.

¹³ Nuair a bhíodarsan breoite chuir mé sacéadach orm; chiapas m'anam le troscadh. Bhínn ag guí ó mo chroí orthu mar a ghuífinn

¹⁴ ar dheartháir liom nó cara; mar dhuine a bheadh ag caoineadh a mháthar, bhí mé crom le cumha.

¹⁵ Ach anois, ó tá mé san fhaopach cruinníonn siad faoi áthas. Tagann siad gan fhios orm, do mo bhualadh, ‘s iad ag tromaíocht gan scíth orm.

¹⁶ Bíonn siad ag magadh fúm gan stad gan staonadh, is a bhfiacla ag díoscán i m'aghaidh.

¹⁷ Cá fhad a bheidh tú ag amharc orthu, a Thiarna? Tar agus fóir orm! Déan m'anam a fhuascailt óna n‑ionsaithe; m'anam ó na leoin.

¹⁸ Tabharfaidh mé buíochas duit sa mhórdháil; molfaidh mé thú sa slua.

¹⁹ An dream atá ina naimhde gan chúis dom, nár dhéana siad gairdeas umam. Agus an dream a thugann fuath dom gan fáth, nár chaocha siad a súile orm.

²⁰ Is fuath leo muintir shuaimhneach na tíre: cumann siad cealg ina n‑aghaidh.

²¹ Deir siad, agus a mbéal ar leathadh acu: “Há, há! Nach bhfacamar féin é!”

²² Chonaic tusa é, a Thiarna; ná bí i do thost; ná bí i bhfad uaim, a Thiarna!

²³ Múscail! agus brostaigh chun mo chosanta a Dhia liom; a Thiarna bí liom.

²⁴ Tabhair breith orm de réir do chirt, a Thiarna; ná maídís a mbua orm, a Dhia.

²⁵ Ná smaoinidís ina gcroí: “Tá buaite againn!” Ná habraidís: “Shlogamar siar é!”

²⁶ An dream lenarb áil mo dhochar, go raibh náire is míchlú orthu! Go gclúdaítear le heasonóir is le haithis lucht maíte i m'éadan.

²⁷ Bíodh gliondar agus gairdeas ar lucht mo pháirte, agus abraidís gan sos: “Moladh leis an Tiarna lenarb áil sonas a sheirbhísigh!”

²⁸ Agus foilseoidh mo theanga d'fhíréantacht agus do mholadh ar feadh an lae.