Salm 34 - An Bíobla Naofa 1981

Eagla Dé

¹ [Salm de chuid] Dáiví nuair a lig sé air bheith as a mheabhair i bhfianaise Aibímeilic nuair a chuir seisean an ruaig air.

² Beannóidh mé an Tiarna i dtólamh beidh a mholadh i mo bhéal i gcónaí.

³ Bíonn m'anam ag déanamh mórtais as an Tiarna: éistfidh daoine ísle agus beidh áthas orthu.

⁴ Móraigí an Tiarna mar aon liom: tugaimis adhradh dá ainm in éineacht.

⁵ Bhí mé ag lorg an Tiarna agus d'éist sé liom agus d'fhuascail sé ó m'eagla go léir mé.

⁶ Féachaigí chuige agus loinnir oraibh ‘s na bíodh luisne na náire in bhur leicne.

⁷ Nuair a scairt an t‑ainniseoir seo d'éist an Tiarna, agus shaor sé óna chúngaigh go léir é.

⁸ Bíonn aingeal an Tiarna i gcampa thart ar lucht a eaglaithe, á bhfuascailt.

⁹ Blaisigí is féachaigí a fheabhas atá an Tiarna: is aoibhinn dá dtagann faoina dhídean.

¹⁰ A dhaoine naofa an Tiarna, bíodh a eagla oraibh; ní bhíonn díth ar an dream lenarb eagal é.

¹¹ Bíonn easpa agus ocras ar leoin óga: ní bhíonn aon easpa ar lucht iarrtha an Tiarna.

¹² Téanaigí, a chlann ó, agus éistigí liom go múinfidh mé eagla an Tiarna daoibh.

¹³ Cé hé an duine a shantaíonn an bheatha? agus fad saoil faoi shéan is faoi shonas?

¹⁴ Coinnigh do theanga ón olc agus do bhéal ó bhriathra éithigh.

¹⁵ Seachain an t‑olc agus déan an mhaith; bí ag lorg na síochána agus lean di.

¹⁶ Bíonn súile an Tiarna ar na fíréin agus tugann sé aird ar a n‑achainí.

¹⁷ Iompaíonn an Tiarna ó lucht déanta an oilc d'fhonn a gcuimhne a scriosadh den talamh.

¹⁸ Éisteann an Tiarna nuair a ghlaonn na fíréin air: fuasclaíonn sé óna gcúngaigh go léir iad.

¹⁹ Bíonn an Tiarna i ngar don lucht coscartha agus tarrthaíonn sé an dream atá do-mheanmnach.

²⁰ Is iomaí sin buairt ar an bhfíréan, ach fuasclaíonn an Tiarna orthu uile é;

²¹ cosnaíonn sé a chnámha go léir; ní bhrisfear oiread is aon cheann amháin acu.

²² Tiománfaidh an t‑olc an t‑éagráifeach chun a bháis, agus daorfar lucht fuatha an fhíréin.

²³ Fuasclaíonn an Tiarna anamacha a shearbhóntaí: ní dhaorfar a dtéann faoina choimirce.