Salm 33 - An Bíobla Naofa 1981

Ina Moltar Deonú Dé

¹ Déanaigí gairdeas sa Tiarna, a fhíréana: is cóir moladh a thabhairt do dhaoine ionraice.

² Gabhaigí buíochas leis an Tiarna ar an gcruit; déanaigí ceol dó ar an gcláirseach dheichthéadach.

³ Canaigí amhrán urnua dó; canaigí go healaíonta is go hardghlórach dó.

⁴ Óir is dílis é briathar an Tiarna, agus is fírinneach a oibreacha go léir.

⁵ Carann sé an chóir agus an ceart agus líonann sé an talamh dá bhuanghrá.

⁶ Lena bhriathar a rinneadh na flaithis: le hanáil a bhéil na realtaí go léir.

⁷ Cruinníonn sé tonnta na mara mar a bheadh i mbuidéal, agus cuireann an dubhaigéan i dtaisce.

⁸ Bíodh eagla an Tiarna ar an domhan uile; bíodh urraim ag a maireann ar talamh dó.

⁹ Labhair sé agus rinneadh gach aon ní. D'ordaigh sé agus ráinig siad ann.

¹⁰ Cuireann sé comhairle na gciníocha ó rath agus beartas na náisiún ar neamhní.

¹¹ Maireann comhairle an Tiarna go brách agus a smaointe ó aois go haois.

¹² Is méanar don chine arb é an Tiarna a nDia: an cine a roghnaigh sé mar oidhreacht dó féin.

¹³ Bíonn an Tiarna ag féachaint anuas ó neamh agus breathnaíonn sé an Ádhamhchlann go léir.

¹⁴ Amharcann sé óna ionad cónaithe ar gach aon neach dá maireann ar talamh -

¹⁵ an té a chum a gcroíthe go léir agus a thugann a mbearta go léir dá aire.

¹⁶ Ní neart a shlua a thugann bua do rí; ní le teann nirt a tharrthaítear an laoch.

¹⁷ Ní hé an t‑each a bhéarfaidh an bua; ní acmhainn dá neart neach ar bith a shaoradh.

¹⁸ Féachann an Tiarna ar an dream lenarb eagal é agus a chuireann a ndóchas ina bhuanghrá,

¹⁹ chun a n‑anam a shaoradh ón mbas agus iad a bheathú le linn gorta.

²⁰ Bíonn ár n‑anam ag feitheamh leis an Tiarna; is é siúd ar gcabhair agus ár sciath;

²¹ is ann a ghairdíonn ár gcroí, is iontaoibh linn a ainm naofa.

²² Go dtaga do bhuanghrá orainn, a Thiarna, de réir an dóchais a chuirimid ionat.