Salm 31 - An Bíobla Naofa 1981

Urnaí an Duine Dhoilíosaigh

¹ Do stiúrthóir an chóir. Salm le Dáiví.

² Is chugat, a Thiarna, a thagaim ag lorg tearmainn; nár dhéantar mo náiriú go brách. Saor mé de réir d'fhíréantachta,

³ éist liom agus brostaigh chun m'fhuascailte! Bí i do charraig choimirce dom: i do dhaingean do mo chosaint is do mo tharrtháil.

⁴ Óir is tú mo charraig agus mo chaiseal; seol mé agus treoraigh mé as ucht d'ainm.

⁵ Scaoil mé ón ngaiste a cuireadh i bhfearas romham, óir is tú mo dhídean, a Thiarna.

⁶ Do do láimhse a thiomnaím m'anam, óir is tú a cheannaigh mé a Thiarna.

⁷ A Dhia na fírinne, is fuath leat lucht adhartha íol gan éifeacht, ach cuirimse mo dhóchas sa Tiarna.

⁸ Déanfaidh mé áthas agus gairdeas faoi do bhuanghrá óir chuir tú spéis i m'anacair agus chuidigh tú le m'anam ina chúngaigh.

⁹ Níor thug tú suas do mo namhaid mé, ach thug tú cead mo chos dom go fada fairsing.

¹⁰ Bíodh trócaire agat orm, a Thiarna, óir tá mé i gcúngach. Tá mo shúil arna dubhadh le tuirse: agus m'anam is mo chroí.

¹¹ Tá mo bheatha á snoí le brón agus mo bhlianta le hosnaíl. Táim ar díth mo nirt le buaireamh; tá mo chnámha á gcnaí.

¹² Rinne ábhar aithise díom do mo naimhde go léir. Tugann mo chomharsana i dtáir is i dtarcaisne mé: is cúis uamhain mé do mo chairde. An dream a chastar sa tsráid orm, teitheann siad uaim.

¹³ Is cosúil mé le marbhán a ndearnadh dearmad de, nó le soitheach a briseadh.

¹⁴ Cluinim cogarnach á déanamh ag a lán, agus imeagla i mo thimpeall. Cograíonn siad lena chéile i m'aghaidh: beartaíonn siad mo bhás.

¹⁵ Ach is ort atá mo sheasamh, a Thiarna, deirim: “Is tú mo Dhia.”

¹⁶ Tá m'anam ag brath ort, saor mé ón namhaid is ó chách ar mo thóir.

¹⁷ Taispeain do ghnúis ghrianmhar do do ghiolla; tabhair slán mé i do ghrá.

¹⁸ Nár náirítear mé, a Thiarna, toisc go nglaoim ort; go gcuirtear náire ar na hurchóidigh. Go gcuirtear ina dtost san uaigh iad;

¹⁹ go mbalbhaítear a mbéal bréagach, a bhíonn ag cáineadh an fhíréin go sotalach le teann uabhair is tarcaisne.

²⁰ Nach lánmhar an mhaitheas atá i dtaisce agat don dream lenarb eagal tú, a thugann tú don mhuintir a thriallann ort i bhfianaise na hÁdhamchlainne.

²¹ Folaíonn tú iad i do láthairse ó chúlghearradh daoine. Coimeádann tú slán i do bhoth iad ó chlampar teangacha.

²² Moladh leis an Tiarna a nocht dom móriontas a ghrá i gcathair dhaingean.

²³ Dúirt mé tráth agus scaoll orm: “Díbríodh as do radharc mé.” Ach d'éist tú le glór mo ghuí nuair a ghlaoigh mé ort.

²⁴ Tugaigí grá don Tiarna, a naomha uile; caomhnaíonn sé na dílsigh. Ach díolann sé an comhar go hiomlán le lucht an díomais.

²⁵ Bígí láidir! bíodh misneach in bhur gcroí agaibh, a dhaoine uile a bhfuil bhur ndóchas sa Tiarna.