Salm 30 - An Bíobla Naofa 1981

Buíochas le Dia as ucht an Salmaí -- a Tharrtháil ón mBás

¹ Salm. Amhrán le canadh ar Fhéile Thiomnú an Teampaill. Le Dáiví.

² Molfaidh mé thú, a Thiarna, de bhrí gur shaor tú mé agus nár lig tú do m'eascairde bheith ag maíomh orm le mórtas.

³ D'iarr mé cunamh ort, a Thiarna, agus rinne tú mo leigheas, a Dhia.

⁴ Thug tú m'anam as an uaigh, a Thiarna, shaor tú mé ón dream a ghabhann síos sa pholl.

⁵ A naomha an Tiarna, tugaigí moladh dó, gabhaigí buíochas lena ainm naofa.

⁶ Ní mhaireann a fhearg ach móimint na huaire; ach maireann a chineáltas ó aois go bás. Bítear ag gol san oíche agus ag gáire ar maidin.

⁷ Is é a dúirt mé trí mhéid mo mhuiníne: “Ní dhéanfar mo shuaitheadh go brách.”

⁸ Bhunaigh do ghrásta, a Thiarna, mar dhaingean sléibhe mé, ach cheil tú do ghnúis orm gur fágadh faoi scéin mé.

⁹ Is ortsa, a Thiarna, a ghlaoigh mé, chun Dé a chuir mé m'achainí. “Cén tairbhe mo bhás má ghabhaim sa pholl?

¹⁰ An molfaidh an deannach thú: an bhfoilseoidh sé do dhílse?”

¹¹ Éist, a Thiarna, go trócaireach; tar, a Thiarna, i gcabhair orm.

¹² Rinne tú rince de mo chaoineadh dom, a Thiarna; bhain tú díom mo rónéadach agus chrioslaigh tú le háthas mé,

¹³ i dtreo go seinnfidh m'anam do mholtaí gan staonadh. A Thiarna, a Dhia liom, molfaidh mé go brách thú.