Salm 29 - An Bíobla Naofa 1981

Glóir Dé san Anfa Toirní

1 Salm le Dáiví

¹ Salm le Dáiví 1 Tugaigí don Tiarna, a chlann mhac Dé, tugaigí don Tiarna glóir agus cumhacht!

² Tugaigí don Tiarna an ghlóir is díol dá ainm; tugaigí adhradh don Tiarna in éide naofa.

³ Tá glór an Tiarna ar an uisce, tá Dia na glóire ag toirneach, tá an Tiarna os cionn na n‑uiscí móra.

⁴ Tá glór an Tiarna go cumasach, tá glór an Tiarna go maorga.

⁵ Briseann glór an Tiarna na céadrais, briseann sé céadrais na Liobáine.

⁶ Cuireann sé an Liobáin ag léim ar nós gamhna agus Sirión ar nós ógdhaimh allta.

⁷ Adhnann glór an Tiarna splancacha tine:

⁸ croitheann glór an Tiarna an fásach, cuireann an Tiarna fásach Cháidéis ar crith.

⁹ Cuireann a ghlór na crainn darach ag luascadh, agus fágann sé an choill gan duilliúr, agus cluintear “Glóir!” ó gach aon neach ina theampall.

¹⁰ Tá an Tiarna ina rí os cionn na díleann. Tá an Tiarna ina rí go brách.

¹¹ Tabharfaidh an Tiarna neart dá phobal; beannóidh sé a phobal le síocháin.