Salm 28 - An Bíobla Naofa 1981

Impí agus Altú Buíochais

1 Le Dáiví.

¹ Le Dáiví. 1 Ortsa, a Thiarna, a screadaim, éist liom, a charraig. Mura n‑éisteann tú beidh mé mar dhuine a ghabhann síos san uaigh.

² Éist le glór mo ghuí is mé ag éamh ort a iarraidh do chúnaimh, ‘s mé ag tógáil mo lámh chugat, a Thiarna, i dtreo do shanctóra naofa.

³ Ná sciob mé i bhfochair na bpeacach i bhfarradh na n‑urchóideach a labhraíonn go cneasta lena gcomharsana agus an t‑olc ina gcroí.

⁴ Tabhair díolaíocht dóibh de réir a ngníomhartha agus mioscais a n‑ainbheart. Tabhair luach saothair dóibh de réir obair a lámh: déan an comhar a dhíol leo.

⁵ Óir is beag acu gníomhartha an Tiarna agus saothar a lámh. Go mille sé iad, is nár thóga sé arís iad.

⁶ Moladh leis an Tiarna toisc gur éist sé le glór mo ghuí.

⁷ Is é an Tiarna mo neart agus mo sciath: tá dóchas mo chroí ann. Tugadh cabhair dom; gairdíonn mo chroí agus canaim amhrán dó.

⁸ Is é an Tiarna neart a phobail, is é dídean shábháilte a ungthaigh é.

⁹ Fóir ar do phobal, tabhair beannacht do d'oidhreacht, á gcothú agus á n‑iompar go brách.