Salm 21 - An Bíobla Naofa 1981

Altú Buíochais

¹ Do stiúrthóir an chóir. Salm le Dáiví.

² Gairdíonn an rí as do chumhacht, a Thiarna, cá hionadh lúcháir air de chionn do chúnaimh!

³ Thug tú mian a chroí go deimhin dó, is níor eitigh tú air achainíocha a bhéil.

⁴ Tháinig tú ina airicis le beannachtaí búidhe, agus chuir tú coróin de ghlanór ar a cheann.

⁵ D'iarr sé an bheatha ort agus bhronn tú fadsaol air a mhairfidh go brách ó aois go haois.

⁶ Is mór é a ghradam de bharr do chúnaimh. Bronnann tú maorgacht agus maise rómhór air.

⁷ Rinne tú ábhar beannachta go brách de; cuireann do láithreacht ríméad is lúcháir air.

⁸ Tá dóchas an rí go daingean sa Tiarna: toisc bhuanghrá an Té is Airde ní dhéanfar a bhogadh.

⁹ Béarfaidh do lámh ar d'eascairde go léir: béarfaidh do dheaslámh ar an dream a thugann fuath duit.

¹⁰ Loiscfidh tú iad mar a dhéanfá i mbruithneach thine an uair a thaibhseoidh do ghnúis. Scriosfaidh an Tiarna ina dhíbheirg iad, agus déanfaidh an tine a slogadh.

¹¹ Scriosfaidh tú a sliocht den talamh agus a gclann as líon na ndaoine.

¹² Bíodh go mbeartóidís an t‑olc i do choinne nó go gceapfaidís an chealg, ní éireoidh leo,

¹³ Óir cuirfidh tú an ruaig is an teitheadh orthu agus teannfaidh tú do bhogha ina n‑éadan.

¹⁴ Éirigh, a Thiarna, i do neart: canfaimid agus ceiliúrfaimid do chumhacht.