Salm 149 - An Bíobla Naofa 1981

Amhrán Bua

¹ Alleluia. Canaigí amhrán nua don Tiarna; moltar é i gcomhthionól na bhfíréan.

² Déanadh Iosrael gairdeas faoina gcruthaitheoir; bíodh ríméad ar chlann Shíón faoina Rí.

³ Molaidís a ainm le rince; déanaidís ceol ar an gcláirseach is ar an gcruit.

⁴ Óir tugann an Tiarna taitneamh dá phobal; tugann sé an bua do lucht na huirísle.

⁵ Bíodh gairdeas ina nglóir ag na fíréin; canaidís le lúcháir ina leapacha.

⁶ Bíodh mórmholtaí Dé ina mbéal acu; agus claíomh an dá fhaobhar ina láimh.

⁷ D'fhonn díoltas a agairt ar na ciníocha, agus diansmacht a chur ar na náisiúin,

⁸ D'fhonn a ríthe a cheangal i gcuibhreacha, agus a n‑uaisle i ngeimhleacha iarainn,

⁹ D'fhonn breithiúnas a chur i bhfeidhm mar a ceapadh dóibh; is í an ghlóir seo atá i ndán dá naoimh uile.