Salm 147 - An Bíobla Naofa 1981

Amhrán Molta agus Buíochais do Dhia as ucht Atógáil Iarúsailéim

¹ Alleluia. Molaigí an Tiarna toisc gur maith é; canaigí Salm dár nDia toisc gur grámhar é; is dósan is dual ár moladh.

A

² Tá an Tiarna ag atógáil Iarúsailéim; tá sé ag bailiú díbeartaigh Iosrael le chéile.

³ Leigheasann sé lucht an chroí bhriste; agus déanann a gcréachtaí a cheangal.

⁴ Socraíonn sé líon na réaltaí; ainmníonn sé ina gceann is ina gceann iad.

⁵ Is mór é ár nDia agus is mór é a neart; níl teorainn ar bith lena eagna.

⁶ Ardaíonn an Tiarna na daoine ísle; agus leagann sé ar lár na hurchóidigh.

⁷ Canaigí don Tiarna le buíochas; seinnigí moladh ar an gcruit dár nDia,

⁸ an té a chlúdaíonn na spéartha le néalta; agus a thugann an fhearthainn don talamh. Cuireann sé an féar ag fás ar na sléibhte; agus luibheanna chun fónamh don duine.

⁹ Tugann sé a gcuid do na beithígh; agus beathaíonn gearrcaigh na bhfiach nuair a ghlaonn siad air.

¹⁰ Ní hé neart an eich is aoibhinn leis; ná ní hiad cosa an duine is taitneamhach leis.

¹¹ Tugann an Tiarna taitneamh do lucht a eaglaithe; don dream ar muinín leo a thrócaire.

B

¹² Tabhair moladh don Tiarna, a Iarúsailéim; tabhair moladh do do Dhia, a Shíón.

¹³ Óir dhaingnigh sé sparraí do dhoirse; agus bheannaigh sé do chlann atá istigh ionat.

¹⁴ Rinne sé síocháin i do chríocha; agus tugann do sháith de phlúr na cruithneachta duit.

¹⁵ Cuireann sé a aithne ag triall ar an talamh; agus gluaiseann a bhriathar go lántapaidh.

¹⁶ Scaipeann sé sneachta amhail olann; croitheann sé cuisne amhail luaithreach.

¹⁷ Leathann sé a leac oighir ina blúirí; cé a fhéadann a fhuacht a fhulaingt?

¹⁸ Cuireann sé a bhriathar uaidh á leá; agus a ghaoth a choscairt an tsneachta.

¹⁹ D'fhoilsigh sé a bhriathar do Iacób; a reachtanna agus a fhoraitheanta d'Iosrael.

²⁰ Ní dhearna sé amhlaidh d'aon chine eile; níor nocht sé a reachtanna dóibh.