Salm 145 - An Bíobla Naofa 1981

Maorgacht agus Ollmhaitheas Dé Salm Aibítreach

1 Moltaí Dháiví.

¹ Moltaí Dháiví. 1 Mórfaidh mé thú, a Dhia agus a Rí; agus molfaidh mé d'ainm trí shaol na saol.

² Molfaidh mé thú in aghaidh an lae; agus molfaidh mé d'ainm trí shaol na saol.

³ Is mór an Tiarna agus is inmholta thar cuimse é; ní féidir a mhórgacht a mhionransú.

⁴ Fógrófar d'oibreacha ó ghlúin go glúin agus foilseofar do chumhacht mar an gcéanna.

⁵ Déanfar trácht ar mhórghlóir do mhaorgachta; agus inseofar d'éachtaí iontacha.

⁶ Labhrófar faoi do bhearta uafásacha; beifear ag caint faoi do chumhacht is do chumas.

⁷ Cuimhneofar ar líonmhaireacht do mhaitheasa; agus déanfar d'fhíréantacht a chanadh go háthasach.

⁸ Is cineálta an Tiarna agus is trócaireach, mall chun feirge, agus lán de thrua.

⁹ Is grámhar an Tiarna le gach aon neach; tá trua aige do gach dúil dá ndearna sé.

¹⁰ Ceiliúrfaidh d'oibreacha uile thú, a Thiarna; agus beannóidh do dhaoine dílse thú.

¹¹ Canfaidh siad glóir-réim do ríochta; agus foilseoidh siad uile do chumhacht,

¹² ionas go nochtfar do chumhacht do dhaoine agus niamhracht agus glóir-réim do ríochta.

¹³ Mairfidh do ríochtsa feadh saol na saol, agus do cheannas go brách na breithe. Is dílis an Tiarna ina bhriathra uile; agus is naofa é ina oibreacha go léir.

¹⁴ Tacaíonn an Tiarna lena mbíonn ag titim; agus tógann sé an dream a bhíonn ar lár.

¹⁵ Bíonn súile gach aon dúile ag feitheamh ortsa; agus tugann tú bia dóibh in am trátha.

¹⁶ Osclaíonn tú do lámh go fialmhar; agus sásaíonn tú a bhfuil beo le do chineáltas.

¹⁷ Is fíréanta é an Tiarna ina shlite uile; agus is naofa é ina oibreacha go léir.

¹⁸ Is gairid é an Tiarna dá ngaireann air, dá ngaireann air go fírinneach ó chroí.

¹⁹ Déanann sé toil an dreama lenarb eagal é; éisteann sé lena n‑éamh agus fóireann orthu.

²⁰ Coimeádann an Tiarna gach duine a thugann grá dó; ach scriosfaidh sé na hurchóidigh go léir.

²¹ Go gcana mo bhéal moladh an Tiarna agus go mbeannaí gach aon neach a ainm naofa; go brách agus go síoraí suthain.