Salm 137 - An Bíobla Naofa 1981

Cois Sruthanna na Bablóine

¹ Cois sruthanna na Bablóine a shuíomar ag sileadh deor, ag cuimhneamh dúinn ar Shíón.

² Ar shaileoga na tíre sin chrochamar ár gcruiteanna.

³ Óir an drong a rinne bránna dínn, d'iarr siad amhráin orainn, agus an drong a bhíodh dár gciapadh, d'iarr siad lúcháir orainn: “Scaoiligí chugainn,” a deiridís, “amhrán d'amhráin Shíón.”

⁴ Conas a chanfaimis amhrán an Tiarna i dtír na gcoimhthíoch?

⁵ Má dhéanaim dearmad ort, a Iarúsailéim, go gcrapa mo dheaslámh!

⁶ Go gceanglaí mo theanga de mo charball, mura gcuimhním ort, mura gcuire mé Iarúsailéim mar bharr m'aoibhnis uile.

⁷ Cuimhnigh, a Thiarna, in aghaidh chlann Eadóm, lá treascartha Iarúsailéim, nuair a dúirt siad: “Scriosaigí í, scriosaigí í; leagaigí go talamh í.”

⁸ A iníon na Bablóine, nach tú an scriosaire! Is méanar don té a dhíolfaidh leatsa na dochair a d'imir tú orainne -

⁹ an té a bhéarfaidh ar do leanaí á mbascadh in éadan na carraige!