Salm 114 - An Bíobla Naofa 1981

Imirce Iosrael as an Éigipt

¹ Alleluia. Nuair a tháinig Iosrael as an Éigipt amach, teaghlach Iacóib ón bpobal barbartha,

² rinneadh sanctóir an Tiarna de Iúdá, agus tharla Iosrael ina ríocht aige.

³ Chonaic an mhuir agus theith sí; agus chas an Iordáin ar ais.

⁴ Ghabh na sléibhte ag léimneach amhail reithí, agus na cnocáin ar nós uan óg.

⁵ Cad fáth, a mhuir, go dteitheann tú? Cad chuige duit, a Iordáin, casadh ar ais?

⁶ Cad fáth a léimeann sibh, a shléibhte amhail reithí, agus a chnocána, ar nós uan óg?

⁷ Bí ar crith, a thalaimh, i láthair an Tiarna; creathnaigh i láthair Dhia Iacóib,

⁸ a chlaochlaigh an charraig ina linn, agus an aill ina foinse uisce.