Salm 113 - An Bíobla Naofa 1981

Moladh le hAinm Dé

¹ Alleluia. Tugaigí moladh, a lucht freastail an Tiarna; molaigí ainm an Tiarna!

² Moladh le hainm an Tiarna i láthair na huaire agus choíche!

³ Ó éirí go luí na gréine, go raibh ainm an Tiarna á mholadh!

⁴ Tá an Tiarna os cionn na gciníocha uile, agus a ghradam os cionn na bhflaitheas.

⁵ Cé is cosúil leis an Tiarna, ár nDia; atá ina shuí ar a ríchathaoir in airde?

⁶ Cromann sé ó na harda anuas chun féachaint ar neamh agus ar talamh.

⁷ Tógann sé an t‑íseal aníos as an deannach; ardaíonn sé den charn aoiligh an duine dealbh,

⁸ á chur ina shuí i bhfochair a phrionsaí, ar aon chéim le prionsaí a phobail.

⁹ Tugann sé sliocht sa teach don bhean gan leanbh; go mbíonn ina máthair chlainne faoi áthas.