Salm 111 - An Bíobla Naofa 1981

Móroibreacha an Tiarna Salm Aibítreach

¹ Alleluia. Gabhfaidh mé buíochas le Dia ó chroí, i gcomhdháil agus i gcomhthionól na bhfíréan.

² Is éachtach iad oibreacha an Tiarna, inscrúdaithe do chách a charann iad.

³ Is oirirc ollásach iad a oibreacha, agus maireann a fhíréantacht go brách.

⁴ Tugann sé orainn cuimhneamh ar a éachtaí; is trócaireach grámhar é an Tiarna.

⁵ Beathaíonn sé an mhuintir ar a mbíonn a eagla; cuimhneoidh sé de shíor ar a chonradh.

⁶ D'fhoilsigh sé cumhacht a bheart dá phobal, nuair a thug sé dóibh oidhreacht na náisiún.

⁷ Is dílis agus is cóir iad a oibreacha; is daingean iad a aitheanta go léir.

⁸ Maireann siad go buan agus go brách; rinneadh iad le fíréantacht is le fírinne.

⁹ Rinne sé a phobal a fhuascailt, agus bhunaigh sé a chonradh go brách. Is naofa a ainm agus is creathnach.

¹⁰ Is é tús na heagna eagla Dé - is ciallmhar iad lucht a adhartha; mairfidh a mholadh go brách.