Salm 108 - An Bíobla Naofa 1981

Is Gaire Cabhair Dé ná an Doras

¹ Tá mo chroí go daingean, a Dhia; tá mo chroí go daingean; canfaidh mé agus seinnfidh mé do mholtaí.

² Múscail, a anam liom! Músclaígí, a chláirseach asgus a chruit; músclóidh mé féin an maidneachan.

³ Gabhfaidh mé buíochas leat idir na ciníocha, a Thiarna; molfaidh mé thú i measc na náisiún.

⁴ Óir síneann do bhuanghrá chun na bhflaitheas, agus do dhílse chun na spéartha.

⁵ Éirigh in airde os cionn na bhflaitheas, a Dhia; bíodh do ghlóir os cionn an domhain uile.

⁶ Ionas go ndéanfaí d'aos grá a shaoradh, fóir orainn le do dheasláimh agus éist linn.

⁷ Labhair Dia ina shanctóir agus gheall sé: “Roinnfidh mé Seicim go ríméadach agus déanfaidh mé Gleann Sucót a thomhas.

⁸ Is liom tír Ghileád, is liom Manaise; is é Eafráim clogad mo chinn. Is é Iúdá mar an gcéanna mo ríshlat;

⁹ Is é Móáb mo bháisín níocháin. Ar Eadóm a bhuailfidh mé mo bhróg; agus béarfaidh mé bua ar Fhilistía.”

¹⁰ Cé sheolfaidh isteach mé sa chathair chosanta? Cé thabharfaidh go hEadóm isteach mé?

¹¹ Nach tú a chuir uait sinn, a Dhia; ionas nach ngabhann tú amach lenár sluaite?

¹² Tabhair cúnamh dúinn in éadan ár naimhde, óir is díomhaoin é cúnamh ón duine.

¹³ Déanfaimid gaisce le cúnamh ó Dhia, óir is é a ghabhfaidh de chosa inár naimhde.