Salm 105 - An Bíobla Naofa 1981

Dílseacht Dé dá Ghealltanais

¹ Altaígí don Tiarna, glaoigí ar a ainm; foilsígí a ghníomhartha do na náisiúin.

² Bígí ag canadh dó, déanaigí a mholadh; insígí a éachtaí go léir.

³ Déanaigí mórtas as a ainm óir is naofa é; gairdigí, a lucht iarrtha, an Tiarna.

⁴ Breathnaígí an Tiarna agus a chumhacht; lorgaígí a ghnúis de shíor.

⁵ Cuimhnigí ar na héachtaí a rinne sé; ar a mhíorúiltí agus ar bhreitheanna a bhéil.

⁶ A shliocht Abrahám, a lucht fónaimh féin! a chlann Iacóib dá ndearna sé rogha!

⁷ Is é an Tiarna féin ár nDia a bhfuil a bhreitheanna i réim ar fud na cruinne.

⁸ Cuimhníonn sé ar a chonradh go brách, ar a ghealltanas go dtí míle glúin,

⁹ an conradh a cheangail sé le hAbrahám, an mionn a mhionnaigh sé do Íosác.

¹⁰ Dhaingnigh sé ina reacht é do Iacób, ina chonradh d'Iosrael go brách,

¹¹ á rá leis: “Tabharfaidh mé Canán duit, chun bheith mar oidhreacht agat féin.”

¹² An uair ba thearc a líon, glac bheag díobh, ina gcoimhthígh sa tír,

¹³ ag imeacht ó chine go cine dóibh, is iad ag fánaíocht ó ríocht go ríocht.

¹⁴ Níor lig sé d'aon neach cos ar bolg a dhéanamh orthu; ach rinne bagairt ar ríthe ar a son.

¹⁵ “Ná leomhadh sibh baint le m'ungthaigh; ná déanaigí dochar do m'fháithe.”

¹⁶ Nuair a ghlaoigh sé gorta ar an tír sin, agus gur mhill sé an t‑arán ar fad orthu,

¹⁷ is amhlaidh a bhí fear curtha rompu aige, mar a bhí, Iósaef, a díoladh i ndaorbhroid.

¹⁸ Ceanglaíodh a chosa le cuibhreacha; crioslaíodh a mhuineál le hiarann,

¹⁹ go dtí gur comhlíonadh a fháistine; is gur dhearbhaigh briathar an Tiarna é.

²⁰ Chuir an rí dá fhios agus d'fhuascail é; rinne taoiseach na gciníocha é a shaoradh.

²¹ Cheap sé ina thiarna ar a theaghlach é, ina mhaor ar a mhaoin go léir,

²² d'fhonn a mhaithe a mhúineadh mar ba mhian leis, agus saoithe a dhéanamh dá sheanóirí.

²³ Tháinig Iosrael isteach san Éigipt dá éis sin; agus bhain Iacób faoi i dtír Hám.

²⁴ Mhéadaigh sé a phobal go mór, go ndearna ní ba láidre ná a naimhde iad.

²⁵ D'athraigh sé a gcroí siúd ionas gurbh fhuath leo a phobal, agus gur bhaineadar mealladh as a sheirbhísigh.

²⁶ Chuir sé Maois, a sheirbhíseach, ag triall orthu, agus Árón, an duine a roghnaigh sé.

²⁷ D'oibrigh siad a chomharthaí ina measc, agus a iontais i bhfearann Hám.

²⁸ Chuir sé an dorchacht chucu agus dhorchaigh sé, ach níor thug siad aird ar a bhriathar.

²⁹ Rinne sé fuil dá n‑uiscí i dtreo is gur mharaigh sé a n‑iasc.

³⁰ Bhí a dtír ag brúchtaíl le froganna, fiú amháin i seomraí a ríthe.

³¹ Labhair sé agus tháinig saithe de chuileoga, agus de mhíolta ar fud na tíre.

³² Chuir sé cloichshneachta chucu in áit fearthainne; agus tine chraosach trína gcríocha go léir.

³³ Bhuail sé a bhfíniúna is a gcrainn fígí; agus threascair sé crainn uile a gcríocha.

³⁴ Labhair sé agus tháinig na lócaistí, agus dreoiliní teaspaigh gan áireamh.

³⁵ Shlog siad a raibh de luibheanna sa tír, agus d'ith siad toradh a dtalaimh.

³⁶ Bhuail sé gach céadghin ina bhfearann, céadtoradh a nirt go léir.

³⁷ Sheol sé amach iad le hór is le hairgead, gan lagrachán ar bith ina dtreibheanna.

³⁸ Bhí áthas ar na hÉigiptigh nuair a d'imigh siad óir bhí uamhan agus eagla orthu rompu.

³⁹ Leath sé néal ina dtimpeall á gclúdach, agus tine a thug solas dóibh san oíche.

⁴⁰ Chuir sé gearra goirt chucu ar a n‑iarratas; agus líon sé le bia ó neamh iad.

⁴¹ Scoilt sé an charraig gur bhrúcht an t‑uisce ina shlaoda; agus scaird sé ina abhainn tríd an bhfásach.

⁴² Óir ba chuimhin leis a bhriathar naofa a thug sé d'Abrahám, a ghiolla.

⁴³ Agus sheol sé a phobal amach le gairdeas; agus a mhuintir thofa le gártha áthais.

⁴⁴ Agus thug sé dóibh críocha na gciníocha; agus ghabh siad a raibh saothraithe ag na náisiúin,

⁴⁵ i dtreo go gcoimeádaidís a reachtanna; agus go gcomhlíonaidís a dhlíthe. Alleluia.