Salm 103 - An Bíobla Naofa 1981

rócaire an Tiarna

1 [Salm le] Dáiví.

¹ [Salm le] Dáiví. 1 Beannaigh an Tiarna, a anam liom; go mbeannaí a bhfuil ionam a ainm naofa.

² Beannaigh an Tiarna, a anam liom; ná tabhair i ndíchuimhne a thíolacthaí uile.

³ Maitheann sé do chionta go léir duit; agus leigheasann sé d'easláintí uile.

⁴ Fuasclaíonn sé d'anam ón uaigh; corónaíonn sé le buanghrá is le trua thú.

⁵ Líonann sé do shaol le nithe fónta; déantar d'óige a athnuachan mar a bheadh iolar.

⁶ Cuireann an Tiarna an fhíréantacht i bhfeidhm; tugann sé ceart dá mbíonn faoi dhaorsmacht.

⁷ Chuir sé a shlite in iúl do Mhaois; agus a ghníomhartha in iúl do chlann Iosrael.

⁸ Is grámhar trócaireach é an Tiarna, foighneach agus lán de cheansacht.

⁹ Ní i gcónaí a bheidh sé ag cáineadh; ní de shíor a bheidh sé i bhfeirg linn.

¹⁰ Ní de réir ár bpeacaí a roinneann sé linn; ní de réir ár gcionta a chúitíonn sé linn.

¹¹ Óir ní airde neamh os cionn talaimh ná a bhuanghrá don dream lenarb eagal é.

¹² Ní faide an t‑oirthear ón iarthar ná an fad a chuireann sé ár gcionta uainn.

¹³ Amhail is trua leis an athair a chlann, is trua leis an Tiarna lucht a eaglaithe.

¹⁴ Óir is eol dó an tslí inar cumadh sinn agus is cuimhin leis nach bhfuil ionainn ach luaithreach.

¹⁵ Is cosúil ré an duine le féar; bláthaíonn sé amhail bláth an mhachaire.

¹⁶ Téann sé ar ceal le leoithne gaoithe, agus ní fios dá ionad féin é feasta.

¹⁷ Ach maireann buanghrá an Tiarna go síoraí don dream ar a mbíonn a eagla,

¹⁸ agus a fhíréantacht do chlann a gclainne nuair a chomhlíonann siad a chonradh go dílis, agus go ndéanann siad de réir a thola.

¹⁹ Shocraigh an Tiarna a chathaoir ar neamh; agus rialaíonn a ríogacht gach aon ní.

²⁰ Molaigí an Tiarna, a aingle uile an Tiarna a dhéanann a réir go cumasach, agus a bhíonn go humhal dá bhriathar.

²¹ Molaigí an Tiarna, a aingle uile an Tiarna, a lucht fónaimh a dhéanann a thoil.

²² Molaigí an Tiarna, a oibreacha uile an Tiarna i ngach uile áit dá bhfuil faoina réir. Beannaigh an Tiarna, a anam liom.