Iób 35 - An Bíobla Naofa 1981

Oirchill Dé

¹ Lean Eilíhiú air lena aitheasc agus dúirt:

² An dóigh leat gur chóir duit A rá: “Táimse fíréanta i láthair Dé”?

³ Agus ceist a chur air: “Cad é sin duitse? Cén dochar duitse é má dhéanaimse peaca?”

⁴ Tabharfaidh mise freagra ort féin Agus ar do chairde chomh maith.

⁵ Féach suas chun na spéartha, agus feic; Spiúnaigh na néalta go hard os do chionn.

⁶ Má pheacaíonn tú, conas a sháraíonn tú é? Más líonmhar iad do chionta cén dochar a dhéanann tú dó?

⁷ Má bhíonn tú fíréanta, cad a bhronnann tú air? Agus cad a fhaigheann sé ó do láimh?

⁸ Do chomharsa a bhíonn thíos le d'urchóid, Agus is leis an duine daonna a bhaineann do dheabhearta.

⁹ Glaonn daoine os ard de bharr géarleanúintí, Agus bíonn siad ag cáiseamh de bharr forneart an tréin.

¹⁰ Ach ní deir aon duine: “Cá bhfuil Dia, mo chruthaitheoir, An té a thugann fóirithint san oíche,

¹¹ Agus a dhéanann sinn níos gaoismheara ná ainmhithe na cruinne. Agus níos críonna ná éanlaith an aeir.”

¹² Glaonn siadsan, ach ní thugann sé freagra, De bharr dhíomas na n‑urchóideach.

¹³ Nach baoth a mheas go bhfuil Dia bodhar, Agus nach dtugann an tUilechumhachtach aon ní faoi deara.

¹⁴ Deir tú: “Ní fheiceann sé mé; Tá mo chás curtha faoina bhraid, ach ní mór dom feitheamh fós!”

¹⁵ Nó: “Ní chuireann a fhearg pionós i bhfeidhm, Ná ní dhealraíonn sé gur eol dó ceannairc na ndaoine.”

¹⁶ Is le barr baoise a osclaíonn Iób a bhéal, Agus le teann aineolais a labhraíonn sé chomh fadálach sin.