Eaxodus 35 - An Bíobla Naofa 1981

Sabóid

¹ Chruinnigh Maois comhthionól uile chlann Iosrael agus dúirt leo: “Seo mar a d'ordaigh an Tiarna daoibh a dhéanamh:

² Déantar saothar ar feadh sé lá; ach ar an seachtú lá, bíodh sabóid naofa, saoire shollúnta agaibh don Tiarna. Aon duine a dhéanann saothar ar bith an lá sin, cuirtear chun báis é.

³ Ná hadhnaigí tine ar bith ar aon tinteáin de bhur gcuid ar an tsabóid.”

Na hÁbhair á gCruinniu don Sanctóir

⁴ Labhair Maois le comhthionól chlann Iosrael go léir: “Seo,” ar sé, “mar a d'ordaigh an Tiarna.

⁵ Cuirigí síntiús don Tiarna i leataobh ó bhur maoin. An fear croí mhóir tugadh sé mar ofráil chun an Tiarna: ór, airgead agus cré-umha,

⁶ ábhar gorm agus corcra agus craorag, agus línéadach mín cas, fionnadh gabhair,

⁷ seithí coirtithe reithe, sitím,

⁸ ola don solas, spíosraí don chriosma agus don túis chumhra,

⁹ clocha oinisce agus clocha lómhara le luí san éafód agus sa lúireach.

¹⁰ Gach fear agaibh ina bhfuil éirim, tagadh sé agus déanadh gach ar ordaigh an Tiarna:

¹¹ an taibearnacal agus a bhoth agus a dhíon, a naisc agus a fhrámaí, a bhataí snadhma, a phollaí agus a cheapa,

¹² an áirc lena cuaillí, cathaoir na trocaire, agus an fial a fholaíonn í;

¹³ an bord lena chuaillí agus a ghréithe agus arán na láithreachta;

¹⁴ an coinnleoir mar an gcéanna don solas, lena mbaineann leis, na lampaí agus an ola le lasadh;

¹⁵ altóir na túise lena cuaillí, an criosma agus an túis chumhra agus an scáthlán don doras ar an tslí isteach sa bhoth;

¹⁶ altóir an uileloiscthe lena gráta cré-umha agus lena cuaillí agus lena gréithe go léir, an t‑umar lena a bhonn;

¹⁷ brait na faiche, a pollaí agus a ceapa, agus an fial don gheata isteach san fhaiche;

¹⁸ pionnaí an taibearnacail agus pionnaí na cúirte agus a dtéada;

¹⁹ na héidí dea-fhite don tseirbhís san áit naofa agus an éide naofa d'Árón an sagart, agus éidí a mhac dá seirbhís sagartachta.”

²⁰ Ansin d'imigh comhthionól uile chlann Iosrael ó láthair Mhaois.

²¹ Agus gach duine a raibh sé de phreab ina chroí, agus de sponc ina chuislinn, rud a thabhairt, thángadar lena síntiús don Tiarna le haghaidh Both na Teagmhála a dhéanamh, do na seirbhísí, agus do na héidí naofa.

²² Thángadar idir fhir agus mhná, a raibh sé de chroí acu, agus thugadar dealga agus fáinní agus bráisléid agus toirc agus seoda óir de gach sórt, a ofráil éigin óir á tíolacadh ag gach duine don Tiarna:

²³ gach duine dár tharla aige ábhar gorm nó corcra nó craorag nó línéadach mín, nó fionnadh gabhair, nó seithí coirtithe reithe, nó seithí gabhair, thugadar leo iad.

²⁴ Gach duine a d'fhéad ofráil airgid nó chré-umha a dhéanamh, thugadar chun an Tiarna iad mar ofráil; agus gach duine dár tharla aige adhmad sitím d'aon tairbhe don obair, thug sé leis é;

²⁵ gach bean le héirim, d'fhíodar lena lámha, agus thugadar leo a raibh fite acu d'ábhar gorm agus corcra agus craorag agus de línéadach mín cas;

²⁶ gach bean a raibh sé de chroí is d'éirim inti, luíodar le fí an fhionnadh gabhair;

²⁷ agus thug na ceannairí clocha oinisce agus seoda le luí san éafód agus sa lúireach,

²⁸ agus spíosraí agus ola don solas agus don chriosma agus don túis chumhra;

²⁹ na fir agus na mná go léir a raibh sé de chroí acu rud éigin a thabhairt don obair a d'ordaigh an Tiarna trí Mhaois a dhéanamh, thugadar - clann Iosrael - é mar ofráil don Tiarna le lántoil.

Ceardaithe don Sanctóir

³⁰ Agus dúirt Maois le clann Iosrael: “Féach! roghnaigh an Tiarna ó ainm Bazalael mac Úirí mac Húr de threibh Iúdá.

³¹ Líon sé é le spiorad Dé, le cumas agus le héirim, le heolas agus le gach sórt ceardaíochta,

³² i gcomhair deartha ealaíonta agus saothair in ór agus in airgead agus i gcré-umha,

³³ i gcomhair seoda a ghearradh dá leaba, adhmad a shnoí, agus gach sórt saothar ceirde.

³⁴ Agus bhronn sé bua teagaisc airsean agus ar Ohoilíáb mac Aichíosámác de threibh Dhán.

³⁵ Líon sé iad le héirim chun gach sórt saothair a dhéanamh a dhéanfadh ceardaí, nó dearaí, nó bróidnéir in ábhar gorm agus corcra agus craorag agus línéadach mín cas, nó fíodóir nó aon sórt saothraí nó dearaí oilte.”