Eagna 4 - An Bíobla Naofa 1981

¹ Is fearr aimride gheanmnaí ná é sin; óir an aimride a gcoimeádtar cuimhne uirthi tá neamhbhásmhaireacht ag gabháil léi, mar bíonn ardmheas ag Dia agus ag daoine uirthi.

² Nuair a bhíonn sí ann déantar aithris uirthi; ach bíonn cumha ar dhaoine ina diaidh nuair a imíonn sí léi; gluaiseann sí ar aghaidh go caithréimeach ar feadh na síoraíochta faoi choróin bláthanna, mar tá sí tar éis an bua a bhreith léi i gcomórtas le haghaidh duaiseanna gan cháim.

³ Ach ní bheidh rath ná bail ar shliocht líonmhar na n‑éagráifeach. Ó fhásann said ó mheatháin bhréige, ní chuirfidh siad fréamhacha doimhne, ná ní bheidh greim daingean acu san ithir ach oiread.

⁴ Óir fiú amháin má chuireann siad craobhacha amach ar feadh tamaill, bainfidh an ghaoth croitheadh astu, toisc iad a bheith éadaingean agus stoithfidh sí óna bhfréamhacha iad lena neart.

⁵ Brisfear craobhacha craptha díobh; beidh a dtorthaí gan mhaith; beidh siad róghlas le hithe agus gan fiúntas ar bith iontu.

⁶ Óir an chlann a ghintear de dheasca comhriachtana neamhdhleathaí, bíonn siad ina bhfinnéithe ar urchóid a dtuismitheoirí nuair a dhéantar mionscrúdú orthu.

Bás Anabaí

⁷ Fiú amháin má fhaigheann an fíréan bás anabaí, beidh sé faoi shuaimhneas.

⁸ Óir ní fad saoil a thugann onóir don seanduine ná ní de réir líon a bhlianta a mheastar é.

⁹ Ach is í an eagna fíorléithe an duine agus beatha gan smál a fhíor-sheanaois.

¹⁰ Ba ríthaitneamhach le Dia é agus thug Dia grá dó; agus ó bhí cónaí air i measc peacach, aistríodh é.

¹¹ Fuadaíodh é ar eagla go n‑athródh an t‑olc a thuiscint nó go meallfadh an chealgaireacht a chroí.

¹² Óir milltear an mhaith le draíocht na baoise agus truaillíonn seachránacht na hainmhéine an aigne shaonta.

¹³ In achar ghearr tugadh chun foirfeachta é sa chaoi gur shlánaigh sé seal mór blianta.

¹⁴ Ba thaitneamhach a chroí leis an Tiarna; ar an ábhar sin thóg sé leis go tapa é ó lár an oilc.

¹⁵ Chonaic na daoine é seo ach níor thuig siad é ná ní mó ná rith sé leo go bhfaigheann muintir thofa an Tiarna grásta agus trócaire uaidh, agus go dtugann sé aire dá naoimh.

¹⁶ Daorann an fíréan marbh na héagráifigh beo, agus an óige a tugadh chun foirfeachta go tapa, lochtaíonn sí seanaois bhlianach an drochdhuine.

¹⁷ Feicfidh siad bás an eagnaí ach ní thuigfidh siad céard a bhí ceaptha ag Dia dó nó cad chuige ar chuir sé ar láimh shábháilte é.

¹⁸ Feicfidh siad é agus caithfidh siad drochmheas air ach déanfaidh an Tiarna gáire fonóideach fúthu.

¹⁹ Ina dhiaidh seo mar sin déanfar corpáin gan onóir díobh, agus beidh siad ina gceap magaidh i measc na marbh go deo; mar leagfaidh an Tiarna ar lár iad ina mbalbháin agus bogfaidh sé óna mbonn iad; scriosfar iad ar fad, agus beidh siad á gcrá agus rachaidh siad i ndearmad agus i ndíchuimhne.

An Breithiúnas Deireanach

²⁰ Tiocfaidh siad agus eagla a n‑anama orthu an lá a dhéanfar a bpeacaí a áireamh, agus de dheasca a ndrochghníomhartha abharfar daorbhreith ina n‑aghaidh.