Eagna 3 - An Bíobla Naofa 1981

Fíréin agus Éagráifigh

¹ Tá anamacha na bhfíréan i láimh Dé agus ní bhainfidh piolóidí leo choíche.

² Ba dhóigh le lucht na díchéille go raibh siad marbh, agus measadh gur thubaiste ab ea a mbás,

³ agus gurbh ionann agus díothú a n‑imeacht uainn. Ach is amhlaidh atá siad faoi shuaimhneas anois.

⁴ Óir bíodh gur fhulaing siad pionós os comhair an tsaoil, bhí siad lán de dhóchas go mairfidís go deo.

⁵ Tar éis dóibh beagán smachtaithe a fhulaingt bronnfar mórán tíolacthaí orthu. Mar chuir Dia féachaint orthu, agus fuair sé a dhíol iontu.

⁶ Thástáil sé iad mar ór i bhfoirnéis agus ghlac sé leo ina n‑íobairt lándóite.

⁷ Ar uair a chuairte drithleoidh siad go lonrach, agus beidh siad ag gluaiseacht mar lasracha tríd an gcoinleach.

⁸ Tabharfaidh siad breith ar chiníocha agus beidh ceannas acu ar náisiúin agus beidh Dia féin ina rí orthu go brách.

⁹ Na daoine a chuireann a muinín ann, tuigfidh siad an fhírinne; agus na daoine a fhanann dílis dó, cónóidh siad ina fhochair faoi ghrá; mar faigheann a phobal tofa grásta agus trócaire uaidh.

¹⁰ Ach smachtófar na héagráifigh de réir mar a thuillfidh a gcuid machnaimh; mar thug siad faillí san fhíréan(tacht) agus thréig siad an Tiarna.

¹¹ Is díol trua iad na daoine a chaitheann drochmheas ar an eagna agus ar an smacht; mar bíonn a ndóchas díomhaoin agus a saothar in aisce acu, agus a ngníomhartha gan éifeacht.

¹² Bíonn a mná céile gan chiall agus a gclann gan mhaith agus is mallaithe é a sliocht.

Is Fearr an Aimride ná Sliocht Éagráifeach

¹³ Is méanar don bhean aimrid atá gan cháim, don bhean nach raibh cuid aici d'fhear go peacúil riamh; nuair a dhéanfar scrúdú ar anamacha, is ansin a bheidh a toradh ar fáil di.

¹⁴ Is méanar chomh maith don choillteán, nach ndearna aon choir i gcoinne an dlí agus nár chothaigh drochsmaointe in aghaidh an Tiarna riamh - mar de bharr a dhílse bronnfar togha duaise air agus oidhreacht níos aoibhne fós i dTeampall an Tiarna.

¹⁵ Óir is oirirc é toradh na ndea-ghníomhartha agus is do-lofa í fréamh na heagna.

¹⁶ Ach ní thiocfaidh clann adhaltrach chun aibíochta choíche; agus an sliocht a ghintear as comhriachtain neamhdhleathach, rachaidh siad ar ceal.

¹⁷ Fiú amháin má bhíonn saol fada acu ní bheidh aon mheas orthu agus ní thabharfar ómós dóibh ina seanaois.

¹⁸ Agus má fhaigheann siad bás go hóg ní bheidh aon dóchas acu, ná ní bheidh aon sólás acu ach oiread lá an bhreithiúnais.

¹⁹ Óir is crua í an chríoch tá i ndán do ghlúin urchóideach.