Eagna 18 - An Bíobla Naofa 1981

¹ Bhí solas sárgheal ann do do chuid naomh; chuala a naimhde, áfach, a nglór, ach ní bhfuair siad aon radharc orthu, agus ó nach raibh siad tar éis pianpháis a fhulaingt mar iad féin bhí siad á rá gur mhéanar dóibh.

² Bhí siad buíoch díobh, freisin, toisc nach ndearna siad aon dochar dóibh d'ainneoin go ndearnadh leatrom orthu féin roimhe sin; agus d'iarr siad mar ghrásta orthu imeacht.

³ Mar sin de, in ionad an dorchadais, sholáthraigh tú colún lasrach mar threoraí dóibh ar bhóthar anaithnid, agus mar ghrian neamhdhíobhálach le linn a n‑imirce glórmhaire.

⁴ Bhí sé tuillte, ar ndóigh, ag a naimhde go mbainfí an solas díobh agus go mbeidís ina gcimí sa dorchadas; óir bhí siad tar éis do chlann mhac a choimeád i mbraighdeanas ar tríothu a thabharfaí solas domhúchta an dlí don saol.

An Deichiú Plá agus an tÉalú

⁵ Shocraigh siad ar naíonáin na naomh a mharú; bhí leanbh amháin ina measc, áfach, a cuireadh amach ach a sábháladh, chun cúiteamh a bhaint díobh ar ball. Is amhlaidh a chuir tú slua mór dá leanaí dá gcois agus dhíothaigh tú iad go léir le chéile san uisce domhain.

⁶ Tugadh fáistine dár sinsir i dtaobh na hoíche sin, ionas go nglacfaidís misneach nuair a bheadh a fhios acu go cinnte cén sórt iad na mionnaí ar chuir siad a muinín astu.

⁷ Bhí do phobal ag súil le slánú na bhfíréan agus le léirscrios na naimhde.

⁸ Óir, faoi mar a smachtaigh tú ar naimhde, sin mar a ghlaoigh tú chugat féin sinn agus a thug gradam dúinn dá bharr.

⁹ Óir bhí íobairt á hofráil faoi cheilt ag clann chráifeach na bhfíréan, agus de thoil a chéile rinne siad an comhaontú diaga seo, go mbeadh siad rannpháirteach sna maitheasaí céanna agus sna contúirtí céanna chomh maith, agus iomainn mholta na sinsear á gcanadh acu mar réamhcheol cheana féin.

¹⁰ Mar fhreagra air sin bhí a naimhde ag ligean gártha míbhinne astu, agus chualathas ar fud na dúiche an caoineadh agus an t‑olagón a bhí siad a dhéanamh ar son a leanaí.

¹¹ Cuireadh an pionós céanna ar sclábhaí agus ar a mháistir araon; agus bhí an phianpháis chéanna á fulaingt ag an ngnáthdhuine agus a bhí ag an rí.

¹² Ag gach uile dhuine acu bhí líon do-áirithe marbhán a fuair bás ar an gcuma chéanna; níor leor na beo féin chun iad a adhlacadh mar díothaíodh an chuid ab uaisle dá gclann in aon nóiméad amháin.

¹³ Óir, siúd is nár chreid siad ní ar bith de dheasca a gcuid asarlaíochta, nuair a díscíodh a gcéadghineanna d'admhaigh siad gurbh é mac Dé é an pobal.

¹⁴ Nuair a bhí gach uile ní faoi chiúnas caoin agus an oíche i lár a mearchúrsa,

¹⁵ léim do bhriathar uilechumhachtach anuas ó na flaithis, óna chathaoir ríoga, isteach i lár na tíre damnaithe, mar churadh cruachroíoch

¹⁶ agus claíomh géar do reachta dho-athraithe ina láimh aige. Nuair a thuirling sé, leath sé an bás ar fud na tíre go léir; agus theagmhaigh sé fós leis an spéir d'ainneoin go raibh ina sheasamh ar an talamh.

¹⁷ Ansin chuir na taibhsí a chonaic siad i mbrionglóidí trí chéile iad go mór ar an mball, agus gabh eagla agus uafás iad gan choinne.

¹⁸ Caitheadh síos ar an talamh iad leathmharbh, duine anseo agus duine eile ansiúd, agus nocht siad cén fáth a raibh siad ag fáil bháis.

¹⁹ Óir, na taibhrimh a chuir trí chéile iad, thug siad an t‑eolas seo dóibh roimh ré ionas nach gcaillfí iad agus gan a fhios a bheith acu, cén fáth a raibh pianpháis á fulaingt acu.

²⁰ Theagmhaigh an bás leis na fíréin chomh maith agus bascadh slua mór díobh san fhásach; ach níorbh fhada a lean an díbheirg.

²¹ Óir ba ghearr gur thosaigh fear gan smál ag troid ar a son, agus é ag beartú airm a sheirbhíse sagartúla, an urnaí agus an túis leorghníomhach; is amhlaidh a sheas sé in aghaidh na díbheirge agus a chuir sé deireadh leis an anachain, rud a thaispeáin gurbh é do shearbhónta é;

²² ní le neart coirp nó le treise lann, áfach, a threascair sé an díbheirg, ach ba lena bhriathar amháin a cheansaigh sé an smachtóir, nuair a thug sé chun cuimhne na conarthaí faoi mhionn a rinneadh lenár sinsir.

²³ Nuair a bhí na marbháin tar éis titim cheana féin ar mhullach a chéile ina gcairn, sheas seisean suas i lár baill, agus bhrúigh sé an díbheirg siar agus dhún sé an bealach chun na mbeo uirthi.

²⁴ Óir bhí an domhan go léir á chomharthú ar a róba lánfhada, agus ainmneacha oirirce ár sinsear greanta ar na ceithre shraith de chlocha lómhara, agus do mhórgacht féin á léiriú ar an gcoróin a bhí ar a cheann.

²⁵ Ghéill an scriostóir do na nithe seo, mar b'eagal leis iad. Óir ba leor do na fíréin blaiseadh a fháil den díbheirg.