Barúch 3 - An Bíobla Naofa 1981

¹ A Thiarna uilechumhachtaigh, a Dhia Iosrael, is anam buartha agus spiorad imníoch atá ag éamh ort.

² Éist, a Thiarna, agus déan trócaire orainn, mar gur pheacaíomar i d'aghaidh.

³ Óir, bíonn tusa i do shuí ar do chathaoir ríoga i gcónaí ach bímidne ag meath gan stad.

⁴ A Thiarna uilechumhachtaigh, a Dhia Iosrael, éist anois le guí mhuintir mharbh Iosrael agus chlann mhac na ndaoine a pheacaigh i d'aghaidh; níor éist siadsan le glór an Tiarna, a nDia, agus carnadh tubaistí orainne dá bharrsan.

⁵ Ná cuimhnigh ar choireanna ár n‑aithreacha ach i láthair na huaire seo cuimhnigh ar do chumhacht agus ar de chlú féin.

⁶ Óir, is tú an Tiarna, ár nDia, agus molaimid thú, a Thiarna.

⁷ Is chuige seo a chuir tú eagla ar ár gcroíthe romhat: go nglaofaimis ar d'ainm; molaimid thú le linn ár ndeoraíochta mar dhíbríomar urchóid ár sinsear a pheacaigh i d'aghaidh, ónár gcroíthe.

⁸ Féach orainn inniu agus sinn ar deoraíocht sa tír ar scaip tú inti sinn le go ndéanfaí sinn a mhaslú agus a mhallú agus a smachtú mar gheall ar choireanna uile ár n‑aithreacha a thréig an Tiarna, ár nDia.

Adhmholadh na hEagna Ba é Tréigean na hEagna Bunúdar na Deoraíochta

⁹ Éist, a Iosrael, le haitheanta na beatha; tabhair cluas d'fhonn an chríonnacht a fhoghlaim.

¹⁰ Cén fáth, a Iosrael, cén fáth a bhfuil tú ag lonnú i dtír do naimhde agus ag dul in aois i dtír iasachta?

¹¹ Cén fáth ar truaillíodh ag na mairbh thú agus ar áiríodh thú orthu siúd a théann síos go Háidéas?

¹² Toisc gur thréig tú tobar na heagna.

¹³ Dá mbeitheá tar éis slí an Tiarna a leanúint bheitheá ag maireachtáil sa tsíocháin de shíor.

¹⁴ Foghlaim cá bhfuil an chríonnacht agus an chumhacht agus an tuiscint, chun a fháil amach ag an am céanna cá bhfuil fad saoil agus an bheatha agus solas don tsúil agus an tsíocháin.

Ní Furasta Teacht ar an Eagna

¹⁵ Cé a fuair amach riamh áitreabh na heagna? Cé a chuaigh isteach ina stórais riamh?

¹⁶ Cá bhfuil ceannairí na gciníocha agus ceansaitheoirí ainmhithe na cruinne?

¹⁷ Cá bhfuil foghlaeirí éanlaith an aeir agus lucht taiscthe airgid agus óir - nithe a gcuireann daoine a muinín iontu - ar dream iad nach bhfuil ríochan lena saibhreas.

¹⁸ Cá bhfuil na gaibhne geala a oibríonn chomh cúramach sin nach bhfuil cur síos ar ealaíontacht a saothair?

¹⁹ Tá siad go léir téaltaithe leo agus imithe síos go Háidéas agus tá dream eile tar éis éirí suas ina n‑áit.

²⁰ Tháinig glúin níos óige ar an saol, agus d'áitrigh siad an tír ina ndiaidh; ach níorbh fhios dóibh ach oiread slí an eolais;

²¹ ná níor thug siad aird ar a bealaí ná ní raibh siad gafa léi chor ar bith; is amhlaidh a d'imigh a gclann mhac i bhfad ar fán óna bealach.

²² Níor chualathas trácht uirthi i gCanán; ná ní fhacthas í i dTéamán.

²³ Fiú amháin sliocht Ágar a bhíonn ar thóir na tuisceana ar an talamh, agus trádálaithe [Mhidián] agus Théamán agus na seanchaithe agus lucht cuardaithe an eolais, níor aimsigh siad slí na heagna ná níor chuimhin leo a bealaí.

²⁴ A Iosrael, nach mór go deimhin é teach Dé! Nach fairsing é a fhearannas!

²⁵ Is leathan é go deimhin agus níl aon teorainn leis; is ard é chomh maith agus tá sé dothomhaiste.

²⁶ Is ann a gineadh na fathaigh cháiliúla, a bhí ann anallód - fír a bhí an-ard agus oilte i gcúrsaí cogaidh.

²⁷ Níorbh iad siúd a thogh Dia, ná ní dóibh a thaispeáin sé slí an eolais.

²⁸ Bascadh iad toisc gan bua na tuisceana a bheith acu; díothaíodh iad mar gheall ar a ndíth céille.

²⁹ Cé a chuaigh suas ar neamh chun breith uirthi agus chun í a thabhairt anuas chugainn ó na néalta?

³⁰ Cé a chuaigh thar lear chun í a fháil agus a cheannach ar thogha an óir?

³¹ Ní eol d'aon duine an tslí chuici ná ní mian le duine ar bith an bealach chuici a leanúint.

Dia a Bhronn an Eagna ar Iosrael

³² Ach an té arb eol dó gach uile ní, is aithnid dósan í. Chuir sé eolas uirthi de thoradh a ghaoise. An té a chóirigh an chruinne chun go mbeadh sí ann go deo, líon sé le hainmhithe ceathairchosacha í.

³³ Seolann sé an solas uaidh féin amach agus imíonn sé leis; b'eisean a ghlaoigh air; agus ghéill an solas dó le teann eagla.

³⁴ Shoilsigh na réaltaí ina n‑ionaid faire agus rinne siad gairdeas.

³⁵ Ghlaoigh sé orthu agus d'fhreagair siad: “Anseo sinn!” Thug siad solas uathu go lúcháireach don té a chruthaigh iad.

³⁶ Eisean ár nDia; níl aon dia eile ann atá inchomórtais leis.

³⁷ Fuair sé amach slite uile na gaoise agus thaispeáin sé do Iacób, a sheirbhíseach, iad agus do Iosrael, grá geal a chroí.

³⁸ Ina dhiaidh sin, chonacthas ar an talamh í agus mhair sí i measc na hÁdhamhchlainne.