Matthieu 1 - La Bible de Genève NT 1669

¹ Livre de la generation de Jesus Christ, fils de David, fils d'Abraham.

² Abraham engendra Isaac. Et Isaac engendra Jacob. Et Jacob engendra Juda et ses freres.

³ Et Juda engendra Pharez et Zara de Thamar. Et Pharez engendra Esrom. Et Esrom engendra Aram.

⁴ Et Aram engendra Aminadab. Et Aminadab engendra Naasson. Et Naasson engendra Salmon.

⁵ Salmon engendra Boos de Rachab. Et Boos engendra Obed de Ruth. Et Obed engendra Jessé.

⁶ Et Jessé engendra le Roi David. Et le Roi David engendra Salomon, de celle [qui avoit esté femme] d'Urie.

⁷ Et Salomon engendra Roboam. Et Roboam engendra Abia. Et Abia engendra Asa.

⁸ Et Asa engendra Josaphat. Et Josaphat engendra Joram. Et Joram engendra Hozias.

⁹ Et Hozias engendra Joatham. Et Joatham engendra Achaz. Et Achaz engendra Ezechias.

¹⁰ Et Ezechias engendra Manassé. Et Manassé engendra Amon. Et Amon engendra Josias

¹¹ Et Josias engendra Jakim. Et Jakim engendra Jechonias et ses freres, sur le temps qu'ils furent transportez en Babylone.

¹² Et apres qu'ils eurent este transportez en Babylone, Jechonias engendra Salathiël. Et Salathiël engendra Zorobabel.

¹³ Et Zorobabel engendra Abiud. Et Abiud engendra Eliakim. Et Eliakim engendra Azor.

¹⁴ Et Azor engendra Sadoc. Et Sadoc engendra Achim. Et Achim engendra Eliud.

¹⁵ Et Eliud engendra Eleazar. Et Eleazar engendra Matthan. Et Matthan engendra Jacob.

¹⁶ Et Jacob engendra Joseph, le mari de Marie, de laquelle est né Jesus, qui est dit Christ.

¹⁷ Toutes les generations donc depuis Abraham jusques à David, sont quatorze generations. Et depuis David jusques au temps qu'ils furent transportez en Babylone, quatorze generations. Et depuis qu'ils eurent esté transportez en Babylone, jusques à Christ, quatorze generations.

¹⁸ Or la naissance de Jesus Christ advint ainsi: Marie sa mere estant fiancée à Joseph, devant qu'ils fussent ensemble, elle se trouva enceinte du S. Esprit.

¹⁹ Alors Joseph son mari, d'autant qu'il estoit juste, et qu'il ne la vouloit point diffamer, la voulut laisser secrettement.

²⁰ Mais comme il pensoit à ces choses, voici, l'Ange du Seigneur lui apparut en songe, disant, Joseph fils de David, ne crain point de recevoir Marie ta femme: car ce qui est engendré en elle, est du S. Esprit.

²¹ Et elle enfantera un fils, et tu appellera son nom JESUS: car il sauvera son peuple de leurs pechez.

²² Or tout ceci est advenu, afin que fust accompli ce dont le Seigneur avoit parlé par le Prophete, disant,

²³ Voici, la vierge sera enceinte, et enfantera un fils, et on appellera son nom Emmanuel, qui vaut autant à dire que DIEU-AVEC-NOUS.

²⁴ Joseph donc estant esveillé de son dormir, fit ainsi que l'Ange du Seigneur lui avoit commandé, et receut sa femme.

²⁵ Et ne la connut point jusques à ce qu'elle eust enfanté son premier né, et appella son nom Jesus.