Sofonías 2 - Be'nnka'be Xti'll Dios

¹ Lewadup wallay re', be'nn bi llaye' yichjraw,

² che'ga bine' chon'ralla re', ka' to yixh beb, da llarante, che'ga bine' yedta yel llruk ke Xanllon re', che'ga ke na soraw llan wlleyi Xanllon re'.

³ Le wayirj Xanllon yoyte re' nak nexjrall sjalla raw yell-li'on, re' llzenayre dan ba bnee gunle. Legun dalixhej, na le gak nexjralle, narachk chetkarize wkoejlle re', llan gaklla Xanllon.

Kan wsakzie'e be'nn ka' sjalla latj yell-liw ka'

⁴ Na yell xhen'na nzi Gaza wadach waranen, na gan nzi Ascalón lekse ka' wadachen, tellakse wachach ake' be'nn ka' zajzu gan nzi Asdod, na be'nn ka' sjalla gan nzi Ecrón lekse ka' wachache'e dukenak ake'.

⁵ Niachraz gak ke re' sjalla gan nzi Creta, re' sjalla lloa nista'on. Diozen ba bdichjbie'e ke re': Canaán, latj yell-liw gan sjalla re' be'nn filisteos ake', wlleyia'a rwe' na nullno be'nn wakoana.

⁶ Latj yell-li'on dan lli lloa nista'on wayaken yixe, ga wadup be'nn ka' llap xhir ake', na lo rej ga cheij bayixe.

⁷ Be'nn Judá ka' bara raw yelguten, le ake' wayak latj yell-li'on ke ake' dayubre, keten Xan ake' Diozen yede'e nench'na walljakrene le ake', na walla kan zobexh aken. Na gana' gap ake' bayix ke ake' ka', na tllele ka' wazirall ake' lo yo' ka' sjanbanle Ascalón'na.

^8-9 Danin ba bnee Xanllon nap doxhente yelwaken, Dios ke Israelen: Ba benla kan zichill be'nn moabitas ka', na kan lladyi' be'nn amonitas ka'. Le aken ba godyi ake' yell kian, na ba blan ake' latj yell-liw ke aken. Kelen'na ba bcheba konen yelnban kian, Moaben gaken kan guk ke Sodoman, na Amón'na ka Gomorra, wayaken yu lix ga cha yay yiech, na wayaken to latj ga kwe zed, gaken to latj dach ke chnare. Na be'nn Judá ka' wagan to chopen koan ake' re', na waganren ake' yell-liw ka' nbaneren.

¹⁰ Danin nak raxj Moaben, na Amón'na, dan godyi ake' yell ke Xanllon, na guk ake' xhen konen yell ke Xanllon nap doxhente yelwaken.

¹¹ Xanllon wchebe'e le ake'. Na wlleyie'e yoyte dios ka' sjalla latj yell-li'on, na le'en werao ake' doxhente yell-liw, na rente yell kaꞌ sajlla radj nista'on.

¹² Lekse ka' re', be'nn Etiopía, Xanllon wlleyie'e re' konen spad ke'en.

¹³ Wli take'en rale nench'na wlleyie'e Asirian, na wakoane'e Níniven to latj dach ga ba nyinj yo' ka', na wayonen to latj yu bill.

¹⁴ Na bray dan nun ake' rill aken wayinjen, na gana' wasjalla ake' xhir ke ake' kaꞌ, na yoyte bayix sjalla yu lix. Bdi'de, na ren badao zu xhire, tas akba raw yay tonn ka' ba baganen, na bechj ka' wkoelj akba raw reij be ka', na raw reij yo' ka'.

¹⁵ Danan naken yell xhen da llun xhen kwine, na zu ake' llak akre nutno bi gune le ake', na ne be'nn yell ka' sjalla rawen, bill zu ye to ke len raw yell-li'on. Lewia ke ba baganen, ba badachen ba bayaken ga sjalla bayixe, nuteze be'nn te kwiten, wxao ake', na wtitj akren.