Bafilipɔ 4 - Zimba Nouveau Testament Portions

¹ Ko boa ngondwa chaanɛ, babotwa naanɛ, baanu kɛmɛmɔ kyanɛ ne boombe bwaanɛ, mokwate ngoo monda mwa Kakua, ee ngondwa chaanɛ.

Lusielo

² Natwisingea Efɔlia na Sintikɛ baongwe ne lokani lɔmɔɔsa monda mwa Kakua.

³ Natɔkɔɛngɛa awɛ bwakaɛ, mokambi naanɛ we kiinɛkinɛ, kwasa baa babakachi bauchiana naanɛ bita bye kosaola Ilɔngɔ Lyaachi, na Kɛlɛma ne basindikichi bakinɛ baa bae ne maina mabɔ kukunyewa mu kitabu kye mwɛchɔ.

⁴ Mwimɛmɛ monda mwa Kakua masu masɛ, natusiboocha, mwimɛmɛ.

⁵ Bɔɔlɛ bwiinu bochebekane ne bando basɛ. Mwaame ndaasi njɔɔ.

⁶ Ndakwikuula naa ne ikomo lɛmɔɔsa; ku ikomo lɛsɛ komosaolea bitokonda baanu, kwiyaya ne kwimɛma ne koeyoka byaobaketea awɛ.

⁷ Nyaa ya Kakua etoeta lokani lɔsɛ, etasange metema yiinu ne lokani lwinu monda mwa Yɛsu Kilisito.

⁸ Kɔ kɔbɔnga, babotwa naanɛ, biisɛ bitaasi maanu, biisɛ bitonyɛmya, biisɛ bye kiinɛkinɛ, bisɛɛ bitaasi ne ikɔya, biisɛ bye mosao mwaachi, biisɛ bya chacha, biisɛ bitowaena kɔɔchɛka, biisɛ biitowaena kwimenywa, bitoangwecha bondo bwe mondo, bye koseka, mubikwate mo ngani chiinu.

⁹ Mokete bia bya eyeela baanu ne kokonja, kuungwa ne kɔmɔa kwanɛ. Nyaa ya Kakua etaongwe niinu.

Mosau wa Paɔlɔ

¹⁰ Naswimɛma byabua monda mwa Mwaame ko boa kwibɔngɛɛ mosombeyoka kabee. Ko boa bɔbɛɛ baanu mo kombeyoka ne moe mokoena maeteo.

¹¹ Sitɔɔcha bɔbɔ kɔmɔa itɛ nae ne bwɔɛnwa, mee naeyee kwimɛma na boa bwe mee.

¹² Natocheba koongwa mo bwɔɛnwa, ne mwikonja bwakaɛ; mu biisɛ ne ku biisɛ bitoolea; naeyee koongwa waɛba, ne koongwa ne njaa bwakaɛ. Natocheba koongwa mu ikonja ne mo bwɔɛnwa bwakaɛ.

¹³ Natɔɔsɔna koketa biisɛ monda mwa Yɛsu ɔtɔmbɛɛcha bɔkɛtɛ.

¹⁴ Moketee bwaachi koongwa naanɛ mo manɛnɛ.

¹⁵ Baanu bɛɛnɛ Bafilipɔ motocheba itɛ, a kobangoka kwe Ikomo lya Kakua, atokee mee Makɛlɔnia, ndekwaba kanisa kakinɛ kaongwee naanɛ amɔɔsa, ɔbɛɛ kɔ kɔɛcha ɔbɛɛ kɔ kɔɛcha lɛni, ne baanu ikɛɛsa Bafilipɔ.

¹⁶ Abɛɛ mee Tɛsalɔnika mondomee mo ngongobwa chabua, bibɛɛ naanɛ saki.

¹⁷ Ndɛɛkɔ itɛ natoenga byɛ kɔmbɛɛcha, alakini natoenga ne bimuka binu byabua.

¹⁸ Nae nɛɛ biemo biisɛ ne kwisaela; naochaa bɛɛ aokonja mee biemo bwe maɛmbwɛ, bitokee kwinu mo mesani ya Epafɔlɔlitɔ, biochwa bya chacha bitokonda Kakua.

¹⁹ Kakua otabaɛchɛ biemo bisɛɛ bitoekya baanu mo ikonja lyaakɛ, monda mwe kɛmɛmɔ kya Yɛsu.

²⁰ Boombe boongwe bwa Kakua Isito mo bieko bisɛɛ. Bɔbɔ.

Malaani

²¹ Baasɛ ba ama monda mwa Yɛsu Kilisito mɔbaɛchɛ mɔyɔ.

²² Ba ama monda mwa Yɛsu baasɛ, batɔmɔɛcha moya Kɛtɛchɛ, baa bae mo ndabo ya Kaisali

²³ Lokwa lwa Mwaame Yɛsu Kilisito, loongwe ko metema yiinu.