Bafilipɔ 3 - Zimba Nouveau Testament Portions

Kilisito ne we kobaelwa

¹ Ku bikinɛ, babotwa naanɛ, mwimɛmɛ monda mwa Mwaame. Biisi bingobee kɔɔtɔkɛa bibakunyee mee; kwinu, bitabaɛchɛ motema.

² Mwailɔlɛa ne imbwa, mwailɔlɛa ne ngambi cha bea, mwailɔlɛa ne sakubɛmbɛ ya bea.

³ Bae na baa bae ne sakubɛmbɛ yee Motema wa Kakua, tutwiyaya ne mamɛngɛ monda mwa Kilisito Yɛsu, ndɛɛkɔ, totobaela bye kɛ lɔkɔba,

⁴ Mee nawaenee kobaela bye kɛ lɔkɔba. Ngoba ne kobaela bye kɛ lɔkɔba, kuusi mondo ungaongwa kombaa kwanɛ.

⁵ Ingɛ ne ko sakubɛmbɛ, nabɛmbiwa lusu lwe kinaanɛ, wɛ kɛɔngɔ ke Isilaɛli, mu mukinda wa Bɛnjamɛ, Moebulania we Baɛbulania, ko Salia Mufalisayɔ,

⁶ ko kosakasaka namɔnyɛɛ Kanisa manɛnɛ, ko koketa bitokonda Salia, kuusi ibɛchi.

⁷ Alakini biisɛ bibɛɛ ikonja kwanɛ, mee na kubichimbecha ko kokonja Kilisito.

⁸ Nasɔmɔa biisɛ bokata ko bwaachi bwe kocheba Kilisito Yɛsu Mwaame waanɛ; koetea awɛ nachimbechee biisɛ, na kubimɔa bwe tubi ko kokonja Kilisito.

⁹ Namɔɛkɛ monda mwaakɛ, siwaenaya koongwa ne bɔnyɛmu botokonjekana koetea Salia, alakini bototokea ku iekekeo lyanɛ monda mwa Kilisito, bɔnyɛmu botokee kwa Kakua koetea iekekeo lyanɛ.

¹⁰ Namochebe awɛ ne bɔkɛtɛ bwe kuubuka kwakɛ, kwisambya ko manɛnɛ maakɛ, naeyane ne kokwa kwakɛ.

¹¹ Kɔmɔa naolee naa ne ko meke njea kukuubuka kwe bakwo.

¹² Ndɛɛkɔ itɛ nasoolea kɔ kɔbɔnga, ɔbɛɛ koongwa we kiinɛkinɛ, nae mo kosakoa meende kɔ kɔmɔa itɛ nakwate bye bondobondo lea ikomo lengetee mee kokwateka na Kilisito Yɛsu.

Kulikitea kɔ lɛbɔngɛ

¹³ Ee babotwa naanɛ, sitwibaeka itɛ nasokwata bye bondo bondo, nae mo koketa keemo kɛmɔɔsa, koebela bisoeta ne kwifɛkɛɛnya ko byee kombaa.

¹⁴ Nae mokoenda meende naolee kɔ lɛbɔngɛ, kokonja biemo bitokonjekana ko mbea mekoo ya Kakua monda mwa Yɛsu.

¹⁵ Bae be kiinɛkinɛ, toongwe na elya saki; kende ku bikinɛ muusi niito kɔmɔɔsa, Kakua otamoangweche bikinɛ.

¹⁶ Ko bobo, ana asoolea bae, tɔɛndɛ moende ɔmɔɔsa.

¹⁷ Babotwa naanɛ, mombeye nɛ kɔlɔla baa batɔɛnda koeyana na boa bɔɛndayɛ bae kombaa kwinu.

¹⁸ Babua bɔtɔmɔa baanu, batɔɛnda mo boangani ne mote we maakanu wa Kilisito, namosaoleaye, kabee nasosaola mo kolela

¹⁹ Batabɔngɛɛ nɛ kɔɔnɛka, yaabɔ ngisi ne ikundu lyabɔ, boombe bwabɔ ne mu bia bitɔbaɛcha masɔni, batɔɛnja ngani chabɔ ne mu biemo bye mɔsɛngɛ.

²⁰ Kombanga yiito, bae nɛ bɛɛnɛ be iyoo, ko boa toe mo koendecha Moolochi wiito, Mwaame Yɛsu Kilisito,

²¹ awɛ otatuule mobee wiito we masɔni koongwa mobee we boombe, kɔ bɔkɛtɛ boa botoketa awɛ biisɛ biemo koongwa mose mwaakɛ.