Bafilipɔ 2 - Zimba Nouveau Testament Portions

Kokonda koetea Kilisito

¹ Ingɛ koe byɛ kɔɛcha bɔkɛtɛ monda mwa Kilisito, ingɛ koe byɛ kɔtɛcha motema mo kokonda, ingɛ koe bye kosambea ko Motema, ingɛ koe bye lokwa,

² monjekye nɛ kɛmɛmɔ mu kuungwana kwinu, mɔbɛ ne kokonda kɔmɔɔsa, mɔbɛ ne motema ɔmɔɔsa, moenge koongwa kɛmɔɔsa,

³ mooketaya naa nɛ kɛmɔ mo meango ɔbɛɛ mu kwiseka bokata alakini mwiyikye ɔɔsɛ mondo ɔmɔɛ bakinɛ boe bakoo koe awɛ,

⁴ ɔɔsɛ mondo ndalɔlaya bitokonda awɛ ikɛɛsa, alakini ɔlɔlɛ kabee bye bakinɛ.

⁵ Mɔɛndɛ bobo asambea banu bɔtɔɛnda abɔ monda mwa Yɛsu Kilisito,

⁶ awɛ waba boe Kakua, ndamɔa keemo kye kwilengeka na Kakua,

⁷ alakini wikɔnɛɛ awɛ mwɛɛnɛ, na kwibeka boe mocha, na kwibeka boe waeyana ne mondo,

⁸ waiiyikya awɛ mwɛɛnɛ mu kuimenya lokwo, lokwo ko mote we maakanu.

⁹ Kɔ bɔbɔ, Kakua wamɔnyɛmya na kɔmɔɛcha chiina le konganda kwe chiina lɛsɛ.

¹⁰ Ko boa ɔɔsɛ ilu lye bae kwiyoo ne bae mɔ mɔsɛngɛ ne bae kose kwe matɛkɛ libungwe ku chiina lya Yɛsu.

¹¹ Ne ɔɔsɛ loleme lɔɔchɛ itɛ: «Yɛsu Kilisito ne Mwaame» ko boombe bwa Tati Kakua.

Kuimenya ne bikete biyee kɔmɔ

¹² Ko bobo ee babotwa naanɛ, bɔbɛɛ baanu mɔ kɔnyɛmya ndɛɛkɔ ikɛɛsa abɛɛ mee niinu kɔmɔɔsa alakini kabee ataasi mee niinu kɔmɔɔsa, mokambee kooloka kwinu ne bɔɔba ne mochanjo.

¹³ Kakua ne otokamba monda mwiinu kokonda ne koketa, mo kokonda kwakɛ.

¹⁴ Mokete biisɛ ndɛ mɔ mɛchɔwɛ ne mo meango,

¹⁵ kɔ bɔbɔ mɔbɛ bando bataasi ne ibɛchi ne bwabea, baana ba Kakua bataasi ne ikɔya mwingya mwee bando baachimbea njea ne baɔnɛka lokani, mwingya abɔ moe mɔ kɔkɛnya boe mimunɛ mɔ mɔsɛngɛ,

¹⁶ Mubunde ngoo Ilɔngɔ lyɛ mwɛɛchɔ, nabɛɛ ne njea yee kwiseka ku lusu lwa Kilisito, kɔ kɔmɔa sachoka lobeo ko bokata aɔ kokamba meemo ko bokata.

¹⁷ Alakini, ɔbɛɛ masi maanɛ manaiteelwa monganda mwee keemo kye kolambolwa ne mokambo wee kuimenya kwinu, naɔmɛma, nɛɛ kɔmɛma kɔmɔɔsa niinu basɛ;

¹⁸ na banu kabee mɔmɛmɛ ne kɔmɛma amɔɔsa naanɛ.

Kotomwa kwa Timɔtɛɔ na Epafɔlɔlitɔ

¹⁹ Natobaela, monda mwa Mwaame Yɛsu, kobatomea Timɔtɛɔ chaa chaa, kɔmɔa itɛ na mee nakonje bɔkɛtɛ ataungwe mee maɔngɔ minu.

²⁰ Siisi ne mondo ukinɛ oe naanɛ lokani lɔmɔsa otamokongoseke ko meanda yiinu;

²¹ basɛ bae ne mu kwilengea abɔ bɛɛnɛ, ndɛɛkɔ koenga makomo ma Yɛsu Kilisito.

²² Alakini Timɔtɛɔ, motocheba itɛ okambee meemo bwe mwaana kwa isa mondo wisambyee naanɛ ko meemo yee makomo ma Kakua.

²³ Awɛ ne otokonda mee komotoma ɛka nasocheba bwaachi bitangolelee;

²⁴ Natocheba monda mwa Mwaame itɛ, mee mwɛɛnɛ ndabe chaa chaa.

²⁵ Namɔnɛɛ bwaachi nabaɔtɔsɛɛ Epafɔlɔlitɔ mobotwa naanɛ, sambe naanɛ, munjinanɛ wee keboka ondomee baanu nɛɛ keochwa kinu.

²⁶ Awɛ ɔbɛɛ nɛɛ saki yee kɔbamɔa banu basɛ ɔbɛɛ mu kulungumana ko boa buungwee banu ilɔngɔ lye bolwachi bwakɛ.

²⁷ Ɔbɛɛ nɛɛ kolwaa, bolwachi bwe lokwo, alakini Kakua omokwee lokwa, ndɛɛkɔ awɛ ikɛɛsa, alakini na mee kabee, kɔ bɔbɔ sibaongwa nɛɛ tosina monganda mwe tosina.

²⁸ Nasotoma Epafɔlɔlitɔ chaa chaa, kɔ kɔmɔmɔa mwimɛmɛ, na mee kabee siungwaya kabee ne tɔsina twa bua.

²⁹ Kɔ bɔbɔ, mɔmɔsɛkɛɛ nɛɛ kɛmɛmɔ monda mwa Mwaame, ne kɔnyɛmya bando boe awɛ,

³⁰ Kɔ kɔmɔa oengee kokwa ko mokambo wa Kilisito, olambolee mwɛchɔ waakɛ ko konjaela keochwa kinu, bitaasi mungaɔsɔna kongolechea baanu bɛɛnɛ.