Bafilipɔ 1 - Zimba Nouveau Testament Portions

Kɔɛcha mɔyɔ

¹ Paɔlɔ na Timɔtɛɔ, bacha ba Yɛsu Kilisito, ko basɛ bae ba ama monda mwa Yɛsu Kilisito, batochikaa mo mosomba we Filipɔ, ko bakoo ne ko basangi:

² Lokwa ne nyaa kotoka kwa Tati Kakua ne kwa Mwaame wiito Yɛsu Kilisito biongwe niinu.

Kwiyaya kwa Paulɔ

³ Naswimɛma na Kakua waanɛ ko kyaanya kɛsɛ ketobaeyoka mee.

⁴ Mɔ kɛsɛ kyaanya, nae mo kobaindoa banu basɛ nɛ kɛmɛmɔ mu kwiyaya kwanɛ

⁵ Kɔ kɔmɔa isamba linu ne Ikomo lya Kakua kobangoa lusu lwe kombaa na leno

⁶ Naswimenya itɛ, olya obangoee monda mwiinu moemo mwaachi, otamusieche ku lusu lwa Yɛsu Kilisito.

⁷ Bie bwaachi ko mee kobaeyoka banu basɛ, kɔ kɔmɔa moe ne iboa mo motema waanɛ, banu bae naanɛ kɔmɔɔsa mo kekako ne mu kwiɔchɛa ne mɔ kɔɛcha Ikomo mwɛchɔ, moe banu basɛ ne kɛɛchwa ko lokwa lokonjee mee.

Maɔngɔ ma Paɔlɔ ne me meemo yaakɛ

⁸ Kakua otocheba bwaachi itɛ, natobakonda banu basɛ byɛ sɛsɛ ne kokonda kotokonda Yɛsu Kilisito.

⁹ Kɔ bɔbɔ, nae mo kwiyaya, kokonda kwinu kokoe lusu ku lusu mo bichebe ne mu kuungwa,

¹⁰ kɔ kɔchɔnjɔa byɛ sɛsɛ, kɔ bɔbɔ mɔbɛ bando ba Kakua ne bataasi ne byabea ku lusu lwa Yɛsu Kilisito,

¹¹ bachaa ne bimuka bye kiinɛkinɛ bitotoka kwa Yɛsu Kilisito, ko boombe ne kosekiwa kwa Kakua.

¹² Natoekya mochebe ee babotwa naanɛ itɛ, bingolelee mee bibɛɛ ne ku kusukua Ikomo lya Kakua leye kombaa,

¹³ Bitochebekana ne ndabo ya mwaame ne bando basɛ itɛ, kekako kyanɛ kee ne ku chiina lya Yɛsu Kilisito.

¹⁴ Ne babua babotwa niito monda mwa Mwaame, batɛchiwɛɛ motema koetea kekako kyanɛ, batɛchɛɛ kɔɛlɛka kosaola Ikomo lya Kakua kotasi bɔɔba.

¹⁵ Bamɔchi kabee, batosaola Kilisito ko kawa ne ko meango, bakinɛ batosaola Kilisito ne motema mwaachi.

¹⁶ Baba batokamba mo kokonda, batocheba itɛ, nae ano ne mɔ kɔɔchɛa Ilɔngɔ Lyaachi.

¹⁷ Bakinɛ batosaola Kilisito ko meango, ndɛɛkɔ ko motema mwaachi, mo kokonda kosekecha tɔngɔnjɔ ko kekako kyanɛ.

¹⁸ Ne eke? Ɔbɛɛ ko meke njea, ko manu ɔbɛɛ ku kiinɛkinɛ, Kilisito oosaoliwa, kɔ bɔbɔ, naɔmɛma. Kabee, ndamɛmɛ.

¹⁹ Natocheba itɛ, bia biisɛ bitabɔngɛɛ ne kɔ mwɛchɔ waanɛ koetea kwiyaya kwinu ne kokwasa kwe Motema wa Yɛsu Kilisito,

²⁰ Kɔmɔa botoendecha mee ne saki ne iekekeo lyanɛ, sikaungwɛ masɔni, alakini ko leno aɔ kɔ lɔsɛ, ne kiinɛkinɛ ko motema, Kilisito otasekiwe mɔ lɔkɔba lwaanɛ, koetea lokwo aɔ mwɛchɔ waanɛ.

²¹ Kwanɛ, mwɛchɔ ne Kilisito, kokwa ne ikonja.

²² Kɔ bɔbɔ, ingɛ mwɛchɔ wɛ lɔkɔba unambɛcha kabee kyaanya ke koketa meemo myaachi, nae bokangwe kɔsɔbɔa.

²³ Natae ne a mambakambaka: ko mbanga ɛmɔ, nae ne saki yee koya ne kuchikaa na Kilisito; bibyɔ ne binaba byaachi.

²⁴ Alakini, ko mbanga ikinɛ, bie bwaachi koe baanu, naongwe mwɛchɔ.

²⁵ Nae ne kiinɛkinɛ itɛ: natocheba nabɛɛ niinu, ne kuchikaa niinu ko baanu koya kombaa ne ko kɛmɛmɔ ke kuimenya kwinu,

²⁶ ko boa, kɔɔtɔka ne kɔmɔɛka kwanɛ kombaa kwinu koongwe keemo keyakeya kye kwiseka kwinu monda mwa Yɛsu Kilisito.

Keboka kye kuimenya

²⁷ Mɔɛndɛ bwaachi boengye ne Ikomo lya Kilisito, ko boa namɔɛ, ingɛ nasoolea kwinu, aɔ naungwe, ingɛ siisi kɔmɔɔsa niinu itɛ, mosoemana ko motema ɔmɔɔsa, mu kuchiana ne motema ɔmɔɔsa ku kuimenya kwe Ikomo Lyaachi.

²⁸ Nde kwilɛkɛa kokangechiwa ne baangani niinu, bia ne koangoecha itɛ bauchimbea, koe baanu bitoangoecha kooloka, na bia bitotoka ne kwa Kakua

²⁹ bie ne ko lokwa lɔɛchiwɛɛ banu, biisi ikɛɛsa ku kuimenya Kilisito, alakini bie kabee ko komokonjea manɛnɛ.

³⁰ Alya, moe mu kuchiana kyakaɛ keboka kɛmbɔichi baanu mo kosekemeka ne kekee mee mo kosekemeka.