Proverbs 8 - Yupik Bible

Umyuartuneq Nanrarluku

¹ Niicugni! Umyuartuneq qayagaurtuq. Taringuuryaraq-llu erinialuni.

² Qertulriit qaingitni tumyaram caniani, cali-llu tumyarat kassuutellratni nangerngauq.

³ Nunarpagmun iteryarami ikirtuqat mengliitni qayagaurtuq waten:

⁴ “Niitesqumaunga elpecen̄un nunam yuinun tamarpeci.

⁵ Taqmiginganrilngurni eliciu taqmigingayaraq. Usviilngurni eliciu ellangqerrsaraq.

⁶ Niicugniciki assilriit qanerkanka; piciulrianek tau͡gaam qanrutamci.

⁷ Piciulrianek tau͡gaam qanerciqua; iqluurutet eq'ukanka wii.

⁸ Qanelqa tamarmi piciuguq; piciunrilngurmek wall'u alarrnarqelriamek ilaituq.

⁹ Taringetulimun ayuquciitnaituq; taringnaqluni-llu elisngalriamun.

¹⁰ Ayuqucirtuutenka cucukiki qerrirliq pivkenaku; elisnganeq-llu cucukluku suulutaaq pivkenaku.

¹¹ “Umyuartuneq assinruan teggalquqegtaarni, cat-llu tamarmeng ayarik'lallerpet pitatekngaunaku.

¹² Wiinga umyuartunruunga ayuqucingumalua; elisngalua, cuqcilqa-llu assirluni.

¹³ Qigcikellra Atanrem eq'ukiyarauguq assiitellriamek. Eq'ukaqa ellminek pivakneq angenruyugtaaneq-llu, assiitellriakun piciryaraq iqluuryaraq-llu.

¹⁴ Picirkiuranka atularanka. Taringumaunga pinirlua-llu.

¹⁵ Wangkun atanret atanirturilartut, atanirturtet-llu wangkun assilrianek alerquutnek taqutaqluteng.

¹⁶ Tamarmeng atanirturilriit nunami atanirturilartut wangnek ikayirluteng, cali atanruvigni ciuliqagtet takarnarqellriit-llu.

¹⁷ Kenkanka kenkestenka; yuum-llu cumiggluni yuaqunia nalaqeciqaanga.

¹⁸ Cikiutekangqertua tukuutnek takarnarqutmek-llu, piluaqeryaramek caitunritlerkamek-llu.

¹⁹ Wangnek unakellren assinruuq suulutaat assinkacagiitni, assinruluni camek auvuilngurmek qerrirlimi.

²⁰ Elluaryarakun ayalartua; maliggluki elluarucim tumyarai,

²¹ tukuurcetaqluki kenkestenka, enait imarturivkarluki tukuutnek.

²² “Atanrem piliaqellerminun ciuqliqlua piliaqellruanga ak'a ciuqvani.

²³ Ciukacagarmek piliaqumallruunga, ellarpak piliaqumavailgan.

²⁴ Piurtellruunga imarpigtangvailgan, mernek-llu ulvelriartangvailgan.

²⁵ Piurtellruunga ingrit ciungatgun, qemit-llu nunakaitnun ellimavailgata.

²⁶ Agayutem piliaqvailgaku nuna carr'ilqat-llu, tumiim-llu imarkanranek nunatangvailgan.

²⁷ Qiliit nunakaitnun ellillrani tuantellruunga, nengtellrani nunam engelii imarpiim akianun,

²⁸ ellillrani amirlut qilagmun, ikirrluki-llu ulvelriit imarpigmi,

²⁹ imarpik-llu alerqurluku ulesqevkenaku qanellni anaggluku. Tuantellrulua-llu nunam tusnganri ellillrani.

³⁰ Caniani uitalua ayuqucirkiurtiicetun enelistet. Angniutekaanga erenret tamaita wiinga-llu nunaniryugglainarlua ciuqerrani;

³¹ angniutekluku nuna, ilukegcitekluki-llu nunam yui.

³² “Taumek niicugnicia ayagyuani. Qanelqa maligtaquluku, angnirniartuci.

³³ Niicugniaqluci ayuqucirtuumaaqavci. Umyuartuci, ayuqucirtuun cakaaqsaunaku.

³⁴ Niisngasteka angnirciquq— yuk uitauralria amiimni erenret tamalkuita, utaqalgirluni enema iteryaraani.

³⁵ Yuum nalaqaqamia unguvamek nalaqut'lartuq, Atanrem-llu ilukegcitkeciqaa.

³⁶ Tau͡gaam nalaqestekenrilkeka ellminek akngirtelartuq; eq'ukesteka kenkilriaruami tuqumek.”