Proverbs 5 - Yupik Bible

Aarcirtuun Akusrarutekiyaramun

¹ Qetunramaa, murilkelluku niicugniu umyuartutaciqa ayuqucingumalqa-llu.

² Elluarrluten yuullerkan nallunrirniaran, qanllerpegun-llu nallunaitniartuq nallunrilnguucin.

³ Arnaq akusrarutekevkatuli qalarciiquq aglumanarcarluni, cakneq unganaqluni,

⁴ tau͡gaam iquani cungarninarqellriatun nangteqnarqellriatun-llu ayuqeciquq.

⁵ Tuqumalriit nuniitnun ayauciiqaaten, tumyaraa tuqumek iqungqertuq.

⁶ Unguvam tumyaraakun ayalriarunrituq. Iqlutmun ayalriaruuq, elliin tau͡gken elpekumavkenaku.

⁷ Kitaki niicugnicia qetunramni, qanruyutenka cakaaryaqunaciki.

⁸ Yaaqvaggun kituqiciu, eniin-llu amiiga mallegyaqunaciu!

⁹ Tuaten pikuvet allat takarnarqutkellren piksaguciiqaat, tuqutauluten-llu takumcuyuyuilngurteggun yugteggun.

¹⁰ Ilumun nallukvet tamakut tukuuteten teguciqait, calillerpegun-llu unangkengaten kia allam piksagulluki.

¹¹ Unguvavet-llu iquani yuuniaraciquten inglerpeni, kemgen cam nerkiitun nangluni.

¹² Qanerciquten-llu, “Ciin tanem elicuitellrusia ellangcaumaaqama! Ciin tanem eq'ukellrusia inerquutenka!

¹³ Ayuqucirturtem̄a qanellrit niicugpek'naki, murilkessuunaki.

¹⁴ Kiituani alqunaq kasnguyullerkamnun wangnun tekitua.”

¹⁵ Piciuluten nulian nulirqiu, ellii kiingan kenekluku.

¹⁶ Irniangeng'e'rpet allatgun arnatgun catngungaitut elpenun.

¹⁷ Irniaten anglinarqai ikayurarkauluten elpet, allat pivkenaki.

¹⁸ Taumek quyakiu nulian angniutekluku nasaurluuluku nuliqsagutellren,

¹⁹ kenegnarluni, pektellra pileryagavkenani. Allamek umyuarteqevkanrilliten kenekminek caqumaluten.

²⁰ Qetunramaa, ciin kenkiyugcit allamek arnamek, kenkiluten allam nulirranek?

²¹ Atanrem tangvagaa caurallren tamalkuan, tangvauralaamiten ayallren tamalkuan.

²² Assiitellriim yuum assiilngui negatun ayuqut. Ellii tamakut piliarin negat pitaqelaraat.

²³ Tuqulartuq umyuangarutni cayugaqami aturyuamiu. Umyugailkartessiyaallran-llu tamaa tuqumun ayagceciiqaa.