Proverbs 4 - Yupik Bible

Piluaqautai Umyuartunrem

¹ Qetunraulriani murilkelluci niiciu atavci ayuqucirtuutii, ellaturiniartuci.

² Assilrianek elitnauramci cakaaryaqunaciki.

³ Tan'gaurlucuaraullemni angayuqaagma kiima yuklua,

⁴ atama ayuqucirtulallruanga qanerluni wangnun, “Qanellrenka umyuaquralaqiki nalluyaguteqaqsaunaki, alerquutenka maligtaquluki, unguvaniartuten.

⁵ Umyuartuluten ellatuluten-llu pikina! Nalluyagucaqunaki nallunguaqsaunaki-llu qaneryaraqellrenka elpenun.

⁶ Cakaaryaqunaku umyuartuneq, camun pivkanritniaraaten. Kenkekuvni qaunqeciqaten.

⁷ Umyuarturillerkan arcaqanqaat cat allat pillerkarpet. Allanek pingqeng'e'rpet ellatuneq piksaguskiu.

⁸ Kenkiu umyuartuneq angelriarurcetniaraaten. Piksaguskuvni takarnarivkarciqaaten.

⁹ Nasqurruciumalriatun ayuqeciquten ucurnarqellriamek.”

¹⁰ Niilluten qetunramaa ciuniurki qanellrenka, unguvamaniartuten.

¹¹ Elitnaullruamken umyuarturisqelluten; ciuliqaggluten elluarrluten yuullerkarpegun.

¹² Piyuakuvet piyuacurlagngaituten, aqvaququvet-llu paallacalkarangaunak.

¹³ Ayuqucirtuuten pegcaqunaku; murilkekiu unguvatkarkaungavgu.

¹⁴ Assiitellriit yuut tumyarait aturyaqunaki, piciryarait-llu tamakut maligtaquksaunaki.

¹⁵ Assiilnguq negurru, aturyaqunaku! Qessakluku unilluku ayii.

¹⁶ Assiilnguut yuut qavaqsailutek'laraat assiitellriamek atuqallerkarteng; qavarciigataqluteng yugmek picurlagceciksaitaqameng.

¹⁷ Caruyagyaraq aaricaraq-llu mertun neqkatun-llu ellaitnun ayuquq.

¹⁸ Tau͡gaam ellualriit tumiit ayuqelartuq unuakuaraam tanqiatun, errngiinalriatun kiituani tanqigiuq.

¹⁹ Assiilnguut tau͡gken yuut tumiit unugtun tan'gercetqapigtellriatun ayuqluni; nallularaat-llu camun paallagtessucirteng.

²⁰ Qetunramaa, murilkiki qanellrenka. Niicugniki qaneryaranka.

²¹ Ciuqerpenek ayagcecaqunaki. Umyuaqurqiki ircaqurpeni-llu qemangqaluki.

²² Taringestem̄eggnun unguvaugut temaitnun-llu iinruuluteng.

²³ Umyuan murilkelluku; umyuarteqlerpetun yuuciqngavet.

²⁴ Piciunrilngurnek qalarteksaunak. Iqluyaraq qannguarutetgun-llu ukvercetaariyarat pegingakiki.

²⁵ Ciunren tangvakiu piciulria pektayiilutekluku; kanangllugcaqunak elpenek kasngukluten.

²⁶ Umyuangcaulluku ciunerkan, elluarrluten ayagniartuten.

²⁷ Negu'urluku assiitellria ciunerpegun ayagluten, avteksaunaku elluam tumyaraa.