Proverbs 31 - Yupik Bible

Ayuqucirtuun Atanermun

¹ Makut atanermun Lemuel-aamun aaniin qanelqai:

² “Elpet wiinga nakmiin qetunraqamken, piicautma kiutekaatgen. Camek wiinga qanerciqsia elpenun?

³ Caurailngauteksaqunaku arnanek kenkuuriyaraq wall'u cagmaryaqunaki akiuteten arniurluten; piunririlaata atanernek.

⁴ Niicugni Lemuel-aaq. Atanret meraarkaunricaaqut wine-amek wall'u tuknilriamek taangamek meryunqegpek'nateng.

⁵ Meraaqameng alerquutet nalluyagutelarait, nallunguangluki-llu yuut enuqitellriit.

⁶ Tuquqatalria taangamek merr'iskiu wine-amek-llu mertelluku cakneq nangteqellria.

⁷ Merteski nalluyagutnauraat arrsauluteng angniinateng-llu ayuqucirteng.

⁸ “Qanercirluki ellmeggnek eguaquutestekailnguut. Piyunarqutiit-llu qaunqelluku casciigalnguut.

⁹ Qanrucilluki elluarrluten cuqcilriarukina. Piyunarquciat murilkiu arrsaulriit enuqitellriit-llu.”

Elluatuulria Nuliaq

¹⁰ Qacignarqenrituq nalaqutlerkaq elluatuulriamek arnamek nulirkaminek. Akitunruami teggalquqegtaarni!

¹¹ Uingan nalirrukenritaa, arrsaungaunani-llu watqapik.

¹² Unguvami taktaciatun elluarrluku uini piciqaa, akngircuunaku.

¹³ Yagarcet'larciquq pililuni qusngit melqurritnek allanek-llu 'lumarraliluni.

¹⁴ Neqkanek yaaqvanek taitelartuq 'laavkiiyurtet sunaicetun.

¹⁵ Erpailgan makluni neqkiularai enelgutni, caliarkilluki-llu pisten̄i arnat.

¹⁶ Nunamek yuvrirraarluku kiputelartuq, akiutni-llu aturluki naucetaarvililuni.

¹⁷ Qacigcuituq, pinirluni, canek taqurqelluni.

¹⁸ Piliami akiit tamalkuita nallunritai, unuurrvianun caliaqluni.

¹⁹ Ellminek yualukalilartuq 'lumarraliluni-llu.

²⁰ Qunukucuunaki-llu arrsaulriit enuqitellriit-llu.

²¹ Umyuarniuruteksuitai qaningraan ilani maqalrianek aklungqerrata.

²² Ingelret qallirkaitnek pililartuq aturangqerraqluni-llu 'lumarraqegtaarnek qesuuranek.

²³ Uinga-llu amlleret nallunritaat, yuut piuranrita ilakluku.

²⁴ Aturanek taqutelartuq naqugutnek-llu, tun'aqluki kupcaanun.

²⁵ Pinirtuq takaqumaluni ciunerkani-llu uluryakevkenaku.

²⁶ Qanraqami qanlartuq umyualegtarnek, elitnauriluni-llu naklekucaramek.

²⁷ Ilani elluarrluki auluk'larai, uitqapigcuunani-llu.

²⁸ Irniarin quyallerteng nasvalaraat, uingan-llu nanraraqluku.

²⁹ Qanerluni, “Amlleret arnat assirluteng nulirrularyaaqut, tau͡gaam elpet pitataituten.”

³⁰ Unganarqellra yuum paqnanarqelartuq, tangssunarqellra-llu pellulartuq, tau͡gaam arnaq Atanrem qigcikestii nanrarnarquq.

³¹ Caliarikun quyakiciu. Tamarmeng-llu yuut takaqekilitgu.