Proverbs 27 - Yupik Bible

Allat Solomon-aam Qanellri

¹ Ucuryaguteksaqunaki unuaqu piarkat. Ernerpak aturarkaten nalluavki.

² Allanun yugnun tau͡gaam nanrarceskina allanrungraata; elpenek piksaunak.

³ Teggalquq uqamaituq qau͡gyaq-llu uqamassakeggluni, tau͡gaam usviilnguum eqcetaarillra uqamaillruuq tamarkegni taukuk.

⁴ Eq'uqerta takumcuyuyuituq navguiyugngaluni-llu, tau͡gaam caunrilngurtun ayuquq pitassiaruskuni ciknayaramun.

⁵ Atawaunruuq pinrilnguarpek'naku inerqurluku yuk, umyuarteqevkarpek'naku kenkenricukluku elpenun.

⁶ Yugnikek'ngarpet akngirteng'ermiten elluarillerkan pitekluku piuq. Tau͡gaam inglukestevvet talliminek amaqigeskaten nutaan murilkekina.

⁷ Aqsikuvet 'vegtaat avullrat paatakaarngalnguq qessakeciqan, tau͡gken kaikuvet neqkaq qatlinarqeng'e'rmi neqniqciquq elpeni.

⁸ Yuk eneminek ayaumalria ayuquq yaqulegtun ungluminek ayaumalriatun.

⁹ Tepkegcautet uqut-llu tepkegcilriit assilivkalaraitkut, tau͡gaam picurlagnarqellriim umyuaq uitanqegciurallranek navgularaa.

¹⁰ Nalluyagucaqunaki yugnikesteten wall'u atavet yugnikestai. Picurlakuvet anelgutevnun ikayurcetaaryaqunak; canimelnguum elaqlirpet ikayunruciqaaten yaaqsilriami anelgutevni.

¹¹ Umyuartucarluten qetunramaa, angnircetniarpenga; kiutekangqerrniartua yugnun cangakuurtemnun.

¹² Ellangqellriit yuut nallunrit'laraat picurlagnarqelria agiirtaqan avilluku-llu, tau͡gaam umyugailnguum aturciqaa tau͡gken ciinlluguaraluni kinguakun.

¹³ Yuk umyugailucini aturluku akqikuni allanrem akiilngui ellminun ellisqelluki, taum aklui tegunarqait akilirillerkaanun asguranairutkevkarluki.

¹⁴ Yugnikeken acivaqaniratellriatun ayuqeciqan qayagpagaluku tuparqekuvgu unuakuarmi.

¹⁵ Qanemyuugarturalria nuliaq ayuquq kutetun kucirturalriatun ellallugmi.

¹⁶ Qaillun nepaiqatarciu? Arulaircetengnaqeqaqsaitan-qaa anuqa? Wall'u uquq unatevgun tegumiaqengnaqluku?

¹⁷ Yuut elitelartut ilameggnek, caviim ipegcaumalauciatun cavigkun.

¹⁸ Aulukekuvni atsanek naugituli napa atsanek neqkangqerciquten. Kevgaq aulukilria ataneminek takaqumaciquq.

¹⁹ Elpet kegginarpet tarenraa tanglaran mermi, tuaten-llu cali yuk umyuamini qemangqaicirmitun ayuqelartuq.

²⁰ Yuum aglumayullra tuqumalriit uitaviacetun ayuquq, piviirucuunani.

²¹ Kenerkun naspaamalartuq suulutaaq qerrirliq-llu teggliq; yuum-llu cali ayuqucia cuqcimayugngaluni.

²² Kaugtuaryaaqeciqan usviilnguq, kaugtuutam au͡g'arciigataa usviilkarcullra.

²³ Murilkiki pitacirrarpetun qusngiyagauteten kuluvauteten-llu,

²⁴ tukuutet taqluteng piuyuilata; atanruviunge'rmeng ak'anun piuyuitut.

²⁵ Can'get kepularaten tuamtellu 'vesraaraat qemit qacarneritni allat naunginanratni.

²⁶ Aturaliciquten qusngiyagaat melqurritnek, kipulluten-llu nunamek akiitnek aturluten qusngirngalngurpet tunllerpet.

²⁷ Ilakuarpet qusngirngalnguut muluk'uurutengqerceciiqaatgen ilaten-llu, pisteten-llu nasaurluut.