Proverbs 25 - Yupik Bible

Cali Allat Solomon-aam Qaneryarai

¹ Ukut-llu waniwa qanruyutai Solomon-aam, ayuqelillrit yuin Hezekiah-m Judah-m atanran.

² Nanrararput Agayun canek iirumaillra pitekluku; takaqaput-llu atanret canek nalqigcillrat pitekluku.

³ Nallunarqelartuq atanrulriim umyugaa, umyuarteq'laami wangkutni arturnarqellrianek, tuarpiaq quyigtalrianek qilagtun et'ullratun-llu imarpiim.

⁴ Qevlerlim tegglim avurrlui au͡g'aquneng munalriim taqsugngaa tangniriluku.

⁵ Assiitellriit ayuqucirturtet atanermek au͡g'arluki, atanirturiniartuq nutaan ellualriakun.

⁶ Nangreskuvet ciuqerranun atanrulriim angenrukcetaaryaqunak, angelriarunguarluten ciuqerrani.

⁷ Assinruciquq ellimerrumakuvet quyinrulriamek calisqelluten qanrucimallerpeni calian tunesqelluku allamun pikegtakumanrulriamun.

⁸ Camek tangengerpet qanercetaarvigmun pilaaksaunak. Allam tangellrukuniu nallunairluku-llu alartellren, qaillun piciqsit?

⁹ Elaqliin-llu pitkangqerquvtek, elpetegnek tamana arenqigingnaqkit'gu aassaqnarqelriit alaircetevkenaki.

¹⁰ Yuut nallunriqatgu camek qemangqaisciigalucin, kasngunarqutekciqan ukanirpak.

¹¹ Yuum umyuangutii elluarrluni nasvaumakuni, ayuquq suulutaatun qaraliliusngalriatun qerrirlimun tegglimun.

¹² Aarcirtuun umyualegmek yugmek niicuumilriamun akitunrulriatun ayuquq suulutaami kulutmi wall'u allami tangnircautmi suulutaamek taqumalriami.

¹³ Pengegnailnguq kevgaq ayagcetestem̄inun ayuquq mertun kumlatun segg'aqanirnarqellriatun kiirmi quyurciyaram nalliini.

¹⁴ Yuut akqilriit cikiqengciqniluteng amta-llu pivkenateng, ayuqut amirlutun anuqetun-llu ellallugkartailngurtun.

¹⁵ Nerinisngialliqevkenani piuralriim unakurainarciqaa watqapik maligtaqucuumiilnguq, atanirturilriarungraan-llu ukvercugngaluku.

¹⁶ Nereksaunak anagarulluten 'vegtaat paatakaarngalnguliaratnek; nervallakuvet miryarciquten.

¹⁷ Elaqlirpenun elalirtaassiyaagpek'nak, taqsuqulluten eq'uyagucuaraaten.

¹⁸ Piciliq'ngelria ilaminek ayuquq tuqunarqelriatun nuussirpagtun wall'u kaugtuutartun, ipellriatun-llu pitegcautetun.

¹⁹ Pillugnam nalliini cacetuqutekilleq yugmek qanellni atuyuilkiinek, ayuquq tamuangnaqellriatun arulalriatgun keggutetgun wall'u piyuangnaqellriatun irulliqluni.

²⁰ Umyuaminek nangteqelria yuarutmek atuuskuvni ayuqeciquq matarqilriatun yugmek nengelmi taryumek-llu elliilriatun kilinermun.

²¹ Inglukesten kaikan nerevkarru; meqsukan-llu merr'illuku.

²² Kiaresngiaceciiqan cakneq, Atanrem-llu akilirciqaaten.

²³ Qannguaryaraq qenercaramek paivcilriaruuq negeqvaq ellallugmek paivcilauciatun.

²⁴ Assinruuq enem kangrani uitalleq, enem iluani uitallermi qanemyuugalriamek arnamek aiparluni.

²⁵ Utaqallerminek assilriamek yaaqvanek niitelleq ayuquq meqsugluni kumlamek melriatun.

²⁶ Yuk assilria maligaruskuni assiilngurmek calilriamun ayuquq marayarrluurtellratun ulvelriim mer'em wall'u assiirutellratun mer'em elakami.

²⁷ Neqniqsaaqengraan assirngaituq 'vegtaat quyurtellratnek paatakaarngalngurmek nerrsiyaakuvet, tuaten-llu nanrarciullerkan pivallakuni ayuquq.

²⁸ Qenqertaqavet nayumiqasciigalkuvgu, ayuquten nunarpagtun yuut navguulluteng itellracetun unilluku-llu casgui navgurraarluki.