Proverbs 24 - Yupik Bible

-19-

¹ Ayuqnianrilki assiitellriit yuut, ilagaryuksaunaki-llu.

² Umyuamegteggun picirkiulaata nangcinaluteng, qalarrluteng picirkartuyarrnaluteng.

-20-

³ Enet taqumalartut tusnganiumaluteng umyuartunermek taringumayaramek-llu.

⁴ Elisngalriit enait aklungqelartut akitulrianek tangssunarqellrianek-llu.

-21-

⁵ Umyuartulria piningqenruuq pinilriami tememikun; ilumun elisnganeq arcaqanruuq pininermi.

⁶ Tua-i-wa picirkiurraarluten tau͡gaam anguyagyarturciqngavet, ayuqucirturtet-llu amlleqata cirlakillerkaq aturciqluku.

-22-

⁷ Umyuartulriim qanellri ayuquciitnarqut usviilngurmun yugmun. Qanerkaitelartuq-llu pinarqelrianek qalartellrianun ilautaqami.

-23-

⁸ Assiilngurnek picirkiurpakalria acilaraat picirkartulriamek.

⁹ Picirkiuraq usviilnguum umyuangutii assiilnguuguq. Yuut eq'ukaat yuk ilaminek caunrilkilria.

-24-

¹⁰ Pinirciigalkuvet nanikuanarqelriim nalliini, tua-i ilumun cirlauguten.

-25-

¹¹ Ancurturpek'nak anautengnaqiu yuk tuqucukiit camek pitkailengraan.

¹² Qaneryaaqsartuten elpet caarkaqenritniluku, tau͡gaam Agayutem nallunritaa cuqingaluku-llu umyuarteqellren. Tangvauralaamiten nallunrituq, akilirciqaaten-llu camek pillren cuqluku.

-26-

¹³ Qetunramaa, neri paatakaarngalngurmek; assirtuq. Paatakaarngalnguum assiuciatun alungutevni neqniqluni —

¹⁴ tuaten ayuquq umyuartuneq assirluni yuucirpenun. Piksaguskuvgu umyuartuneq ciunerkangqerciquten assilriamek.

-27-

¹⁵ Assiitellriatun yugtun piyaqunak, umyuangcalartut uayarnaluki ellualriit enairluki tuaten.

¹⁶ Ellualria yuk amllerqunek iqulang'e'rmi ataam nangertelarciquq; tau͡gken assiitellriit yuut pinerrlugtaqameng piunrituluteng.

-28-

¹⁷ Quyayaqunak inglukesten picurlangraan angniutekevkenaku-llu iqungraan.

¹⁸ Atanrem nallunriciiqaa ciritekekuvgu, quyangaunani-llu; aipaagni-llu anucimirqecetaarngaunaku.

-29-

¹⁹ Uitacurlautekenrilki assiitellriit yuut; ayuqniarpek'naki-llu.

²⁰ Assiitellria yuk ciunerkailan, camek-llu neryuniurutaunani.

-30-

²¹ Qigcikiu Ataneq qetunramaa, atanrulria-llu takaqluku. Ilagauteksaunak ingluliurutellrianun elkegnun;

²² tuaten pilriit cairucugngiita egmian. Nallunritenritan-qaa uayaariyugngacia Agayutem atanrulriim-llu?

Allat Cali Umyuartulriartaat Qaneryarat

²³ Umyuartulriit makut maa-i cali qanellrit: Ingluarvikilleq cuqciluni assinrituq.

²⁴ Tauna cuqcilria qanqan pinarqellria pinarqenritniluku, aniqlaaciqaat eq'ukluku-llu tamalkurmeng yuut.

²⁵ Cuqcistet anucimirqecetaarilriit pinarqelrianek piluaqerciqut elluakumaluteng-llu.

²⁶ Iqluurpek'nani kiulriim nallunairaa ilumuuluni yugnikilriarucini.

²⁷ Eneliyaqunak yuungnaqsaqunak-llu naucetaarviten upingarivailgata enuqisngairulluten-llu.

²⁸ Camek pitkaunak nallunritesten͞guyaqunak elaqlirpenun, qanrutkekuvgu-llu tauna iqluyaqunak.

²⁹ Waten qaneryaqunak, “Elliin wangnun pillratun wiinga-llu piciqaqa!”

³⁰ Piyuallemni menglaiqengua qessanqurrulriim usviilnguum naucetaarvianek.

³¹ Cukilanat naunerrluut-llu nauluku, teggalqut-llu casgui imumaluteng.

³² Tangvagluku umyuangcautekluku camek eliyutkaqa.

³³ Piyukuvet qavaqacikina piyukuvet-llu qavaryugluten qavaqina. Talligken amaqigglukek mernuinercia,

³⁴ tau͡gaam qavainanerpeni cairutlerkarpet tekiciiqaaten teglegyulriatun.