Proverbs 23 - Yupik Bible

-6-

¹ Nerqataquvet atanirturilriamek aiparluten umyuaqekiu takarnarqucia.

² Nernertukuvet elpenek murilkelluten nerrsiyaagyaqunak.

³ Neqkat assingraata nerlaagyaqunak naspaaluten piyuaraaten.

-7-

⁴ Elpenek nangcaqunak tukuurtengnaqluten.

⁵ Akit unakelten cagmarciqut egmianun, yaqungelriatun metervagtun tengciqut.

-8-

⁶ Nerellguciryaqunaku qunutungalria yuk aglumavkenaki-llu neqkaqegtaaraat paivtellri.

⁷ Waten piciqaaten, Kiiki cali nerluten, tau͡gaam umyuamikun tuaten ayuqngami piciuluni pinrituq.

⁸ Elpet-llu miryarciqaten nerelten, cauvkenateng-llu unganarcarluten qalartelten.

-9-

⁹ Ellangcautnek qalarucaqunaku usviilnguq yuk, tua-i-wa caunrilkeciqngaki qanruyuteten.

-10-

¹⁰ Yuum nunautiin ak'allaq cuqiin nallunailkutii au͡g'arngaitarci watqapik wall'u tegungaitarci elliraat nunautiit.

¹¹ Ataneq artuqailnguq anagyaaqutestekaat, ililirciqai ellaita piyullratnek inglulirluci.

-11-

¹² Murilkiu elitnauruten elitengnaqluten pitacirpetun.

-12-

¹³ Mikelnguq anucimirqecetaanrilkurteksaunaku; kaugtuangerpeni tuqungaituq;

¹⁴ aipaagni tau͡gaam kaugtuarluku tuqumek aviuciiqan.

-13-

¹⁵ Qetunramaa, umyuarturikuvet angnirciqua cakneq.

¹⁶ Umyuaqa-llu quyigciquq qalareskuvet umyuartulriartarnek.

-14-

¹⁷ Ayariyaqunaki assiilnguum caliaqestai; tau͡gaam qigcikerrlainaqiu Ataneq erenret tamaita.

¹⁸ Tuaten pikuvet ciunerkan tengrunarqeciquq.

-15-

¹⁹ Niicugni qetunramaa, umyuartucarluten umyuangcaa qaillun ayuqluten yuullerkarpenek.

²⁰ Ilagauteksaunak anagulluteng mer'ayulrianun wine-amek nernertulrianun-llu.

²¹ Taangaryunqellriit nernertulriit-llu cairuciiqngata. Neryunqellriarukuvet qavaryunqeggluten-llu atataarqu atulangciquten allguumalrianek aturanek.

-16-

²² Niisngau aatan; tua-i-wa elliin yuurcetellruaten. Aanan-llu arnaureskan quyallren elliinun nasvaggu.

²³ Piciulria, umyuartuneq, elisnga, ellatuneq-llu — akiliryugngakuneng ukut akiseng patumaat, tau͡gaam cakneq qununaqluteng elpeni tunllerkaat.

²⁴ Ellualriim yuum atii elluatun angniutengqelartuq. Umyuartulria qetunraq quyanarqelriaruami.

²⁵ Ilukegcivkarkek angayuqaagken. Aanan elpenek irnilleq angnirceskiu.

-17-

²⁶ Qetunramaa, murilkenqegcaarluten, ayuquciqa cuqyutkiu.

²⁷ Akissut arnat-llu akusrarutekevkatulit pissuutetun tuqunarqelriatun ayuqut.

²⁸ Nayulartut teglengalriatun angutet amlleret allaliurcetaqluki.

-18-

²⁹ Kinkut umyuarniulartat, angniinateng? Kinkut callualartat? Kinkut-llu qanemyuugalartat? Kinkut-llu kilinengqelartat camun piciinateng wall'u iingit kavircen̄ateng?

³⁰ Taukuugut wine-amek merpakalriit, avumalrianek-llu wine-anek pitassiarayulriit.

³¹ Aglumanrilgu wine-aq kavircetengraan tangellra-llu igyunaqnganani saskam iluani.

³² Iqungqertuq tuqunarqelriim ciissirpiim keggellratun.

³³ Tangaaciquten cauciilngurnek, umyuarteqesciiganak qalartesciiganak-llu elluarrluten.

³⁴ Imarpigmi uitalriatun ayuqeciquten, miryalnguluten, wall'u angyam uvaalriim napartiin kangrani uitalriatun.

³⁵ Waten qanerciquten, “Kaugtullruyugnarqaatnga wall'u-qaa nangtellruatnga, tau͡gken pillrat wii nalluluku? Ciin tupagyunricia meryalrianga cali.”